სამსუნგმა ახალი ტელეფონის ოფიციალური თიზერი გამოაქვეყნა. Galaxy S8 მალე იხილავს მზის შუქს. როგორც Mobile World Congress-ზე ითქვა, პროდუქტის პრეზენტაცია 29 მარტს იგეგმება, თუმცა მანამდე შეგვიძლია შორიდან გავიცნოთ ახალი მოდელი.

კორეულმა კომპანიამ რამდენიმე საათის წინ Galaxy S8-ს თიზერი Youtube-ზე გამოაქვეყნა. This is a phone (ეს არის ტელეფონი) - ამ სახელით არის დაანონსებული კომპანიის მიერ ატვირთული უკანასკნელი ვიდეო.

თიზერში ნაჩვენებია "ძველი" ტიპის სმარტფონები, რომელთაც ოთხკუთხედი ეკრანი ჰქონდათ. ასეთი ტელეფონები დღემდე გამოდის. სამსუნგმა თიზერში ასეთი სმარტფონები წარსულად მოიხსენია. პატარა გოგონა "მოძველებული" სმარტფონის ფორმის მქონე ორცხობილას თეფშიდან იღებს და კბეჩს, რა დროსაც ჩნდება წარწერა - This was a phone (ეს იყო ტელეფონი).

სამსუნგი ამ დრომდე არ ახმაურებს ახალი მოდელის შესახებ კონკრეტულ დეტალებს, თუმცა ყველაფერი სულაც არაა გასაიდუმლოებული.

ვრცელდება ინფორმაცია, რომ ახალი Galaxy-ის ორი მოდელი, S8 და S8+ გამოვა. წინა მოდელების მსგავსად, ახალი პროდუქტის წინა კორპუსიც მთლიანად მრუდხაზიანი ეკრანით იქნება დაფარული. S8-ს ეკრანის ზომა 5,8" იქნება, ხოლო S8+ მოდელის - 6,2".

სავარაუდოდ, ახალი ტელეფონი Snapdragon 835-ის პროცესორით, 4GB ოპერატიული მეხსიერებით, 68GB-იანი ტევადობითა და დამატებითი მეხსიერების ბარათის ინტეგრირების უნარით იქნება აღჭურვილი.

გავრცელებული ხმების თანახმად, Samsung Galaxy S8/S8+ წყალ და ნესტგამძლე იქნება. მისი ელემენტი უფრო დიდხანს გაძლებს, ვიდრე S7/S7 Edge ძლებდა. იგი ასევე აღჭურვილი იქნება თითის ანაბეჭდის (რომელიც სავარაუდოდ უკანა მხარეს ექნება გადატანილი) და თვალის სკანირების ფუნქციებით. უკანა კამერა 12, ხოლო წინა კამერა - 8 მეგაპიქსელიანი იქნება.