9 მაისს მსოფლიოს რამდენიმე ქვეყანაში დედის დღე აღინიშნა.

ამ დღის საზეიმოდ მეგან მარკლმა და პრინცმა ჰარიმ მიუსაფარი დედებისა და მომავალი დედების დასახმარებლად შეწირულობა გაიღეს. შეწირულობა, რომელიც საფენებს, ჰიგიენურ საშუალებებსა და ბავშვის მოვლისთვის აუცილებელ სხვა ნივთებს მოიცავს, წყვილის დაფუძნებულმა ფონდმა Archewell-მა დააფინანსა.

ინფორმაცია ამის შესახებ ინსტაგრამზე გაავრცელა და წყვილს მადლობა გადაუხადა მიმღებმა არაკომერციულმა ორგანიზაციამ Harvest Home.

პოსტს თან ერთვის წერილი, რომელიც მეგანმა ორგანიზაციას შეწირულობასთან ერთად გაუგზავნა.

"როგორც დედა და ასევე მომავალი დედა, დიდად ვაფასებ საზოგადოების მხრიდან მხარდაჭერის, უსაფრთხოებისა და ორსულობისას აუცილებელ ნივთებზე ხელმისაწვდომობის უზრუნველყოფის მნიშვნელობას. ასევე, საგულისხმო რჩევებს აღზრდის პროცესში. ეს ყველაფერი აუცილებელია, არა მხოლოდ ჩვენი ფიზიკური ჯანმრთელობისთვის, არამედ მენტალური კეთილდღეობისთვისაც. სწორედ თანამგრძნობი და ამ ღირებულებების მოზიარე საზოგადოების შექმნისთვის გიძღვნით მე ქებას.

"მადლობას გიხდით იმ ყველაფრისთვის, რასაც ქალებისა და დედებისთვის აკეთებთ. მათთვის, ვინც საკუთარი მიზეზით არ აღმოჩენილა უმწეო მდგომარეობაში. როცა წარმოვიდგენთ, რამდენად დაუცველად გრძნობს ნებისმიერი ქალი ორსულობის რთულ პერიოდში თავს, უკეთ შეგვიძლია იმის გააზრებაც, რაოდენ უფრო მძიმეა სიტუაცია არათეთრკანიანი ორსულებისა და იმ ქალებისთვის, ვინც გაჭირვებულ და მოწყვლად თემში ცხოვრობს. ვიმედოვნებ, თქვენი ორგანიზაციის ბენეფიციარების დასახმარებლად შემოთავაზებულ ჩემს მხარდაჭერას მიიღებთ".

ფოტო: Samir Hussein

მეგანსა და ჰარის უკვე ჰყავთ შვილი, 2 წლის არჩი, თუმცა, ცოტა ხანში მეორე შვილის მშობლებიც გახდებიან. წყვილის თქმით, ისინი გოგოს ელოდებიან.

"მე და ჩემს ქმარს ძალიან გვიხარია, რომ მალე ჩვენს გოგოს შევხვდებით. ამ გრძნობას მსოფლიოში მილიონობით სხვა ოჯახთან ერთად ვიზიარებთ", — აღნიშნავს მეგანი, — "როცა მასზე ვფიქრობთ, წარმოვიდგენთ მთელ მსოფლიოში მცხოვრებ ყველა ახალგაზრდა ქალსა და გოგოს, რომელთაც უნდა ჰქონდეთ შესაძლებლობა და მხარდაჭერა, წინ გაგვიძღვნენ".

რაც შეეხება წყვილის დაფუძნებულ საქველმოქმედო ორგანიზაციას, Archewell, ის 2020 წლიდან არსებობს. ორგანიზაციის ცნობით, არაკომერციული გაერთიანება ცდილობს "თანაგრძნობის ძალის გაღვივებით სისტემური კულტურული ცვლილება მოახდინოს".