ზამბიაში ეთიოპიის ავიახაზების კუთვნილი თვითმფრინავი ჯერ კიდევ დასამთავრებელ აეროპორტში დაეშვა. ადგილობრივი ხელისუფლების წარმომადგენლების ცნობით, ეს "შეცდომით" მოხდა.

როგორც ცნობილი გახდა, სატვირთო თვითმფრინავი კვირას, ქვეყნის ჩრდილოეთით მდებარე კოპერბელტის პროვინციაში დაეშვა მომავალ აეროპორტში, სადაც სამუშაოები ჯერ კიდევ მიმდინარეობს.

"როცა პილოტმა დაშვება დააპირა, რადიოლოკატორზე მყოფებს დაუკავშირდა; მათ კი უთხრეს, რომ თვითმფრინავს ვერ ხედავდნენ", — ამბობს ქვეყნის სატრანსპორტო სამინისტროს წარმომადგენელი, მიშეკ ლუნგუ, — "ამიტომ, რადგან კონტროლი ჰქონდა დაკარგული, მან გადაწყვიტა საკუთარ ხედვას ნდობოდა და იმ აეროპორტში დაშვებულიყო, რომელიც, როგორც აღმოჩნდა, ჯერ კიდევ დასამთავრებელია".

ლუნგუ ასევე დასძენს, რომ ინციდენტის შედეგად არავინ დაშავებულა. უფრო დეტალური ინფორმაცია კი მოგვიანებით გამოქვეყნდება, როცა გამოძიება დამთავრდება.

მიუხედავად იმისა, რომ ეთიოპიის ავიახაზების კომპანიას ტვიტერის საკუთარ გვერდზე მომხდარი არ უხსენებია, მათ დაადასტურეს, რომ ზამბიის უწყებებთან თანამშრომლობით გამოძიება მიმდინარეობს.

პანდემიის შედეგად ავიახაზების ინდუსტრია დიდად დაზარალდა, თუმცა, კომპანია, რომლის თვითმფრინავსაც ინციდენტი მოუხდა, ბოლო ერთი წელია, მეტწილად სატვირთო გადაზიდვებს ასრულებს.

რაც შეეხება დასამთავრებელ აეროპორტს, მისი მშენებლობა 2020 წელს უნდა დასრულებულიყო, თუმცა, პროცესი კოვიდპანდემიის გამო შენელდა.