მუზამე წარმოგიდგენთ აუდიო-ვიზუალურ პროექტს THE KVB.

THE KVB ბრიტანელი მუსიკოსის, ნიკოლას ვუდის, იგივე კლაუს ფონ ბარელის პროექტია, რომელიც მძიმე პოსტ-პანკ, ინდუსტრიულ ჟღერადობასა და ჰიპნოტურ, ფსიქოდელიურ ვიზუალურ იმიჯებს აერთიანებს.

კლაუს ფონ ბარელის ექსპერიმენტი სტარტს 2010 წელს იღებს. ავტორს ამავე წელს ვიზუალ არტისტი Kat Day შეუერთდა და 2012 წელს დუოს პირველი ალბომი Always Then გამოვიდა. 2013 წელს ლეიბლზე A Recordings მათი მეორე დისკი Minus One გამოიცა, ხოლო Cititraz-ზე რემიქს-EP Immaterial Visions-ის რელიზი შედგა. მის შექმნაში მონაწილეობა ისეთმა ცნობილმა პროდიუსერებმა მიიღეს, როგორებიც არიან Shifted, Regis, Silent Servant და Worn.

2015 წელს THE KVB-ით ლეგენდარული ჯგუფის, Portishead-ის წევრი, ჯეფ ბეროუ დაინტერესდა და მის ლეიბლზე Invada კოლექტივის მორიგი ალბომი Mirror Being ჩაიწერა. განსაკუთრებით მნიშვნელოვანი იყო THE KVB-ის ისეთ საკულტო ჯგუფთან თანამშრომლობა, როგორიცაა Psychic TV. მათ ერთობლივი ტურნე 2015 წელს გამართეს.

ბენდმა რიგით მეოთხე დისკი ...Of Desire 2016 წელს გამოუშვა. ჩანაწერი კოლექტივის შემოქმედებაში ყველაზე წარმატებულ ნამუშევრადაა მიჩნეული. ექსპერიმენტული, მძიმე ელექტრო ბიტებით შექმნილი მუსიკის დამსახურებით კოლექტივი თანამედროვეობის ერთ-ერთ ყველაზე იმედისმომცემ ჯგუფად აღიარეს.

Always Then, White Walls, From Afar კოლექტივის ის ნამუშევრებია, რომელთა დამსახურებითაც მათ შემოქმედებას მსმენელი წლიდან წლამდე ემატება.

THE KVB-ისთან ერთად SPACEHALL-ის სცენაზე შეძლებთ 2015 წლის ელექტრონავტის გამარჯვებულ Kozmana-ს, Tete Nosie-ისა და VazhMarr-ის მოსმენას.

THE KVB საქართველოს პირველად ექსპერიმენტული მუსიკალური პროექტის მუზამეს ფარგლებში ეწვევა. მუზამე თითქმის ერთი წელია ქართველი მელომანებისათვის ქმნის სივრცეს, რომლის ფარგლებშიც მსმენელს შეუძლია თანამედროვე თუ უკვე ლეგენდად ქცეულ არტისტებს მოუსმინოს.

მუზამეს ფარგლებში თბილისს უკვე ეწვივნენ ისეთი მუსიკალური ჯგუფები, როგორებიცაა: Psychic TV, The Radio Dept., Soap&Skin და Easter.