ყოველ წელს, 14 თებერვალს უამრავი ადამიანი ხაზს უსვამს საკუთარ უფლებას - უყვარდეს და იქორწინოს თავის მიერ არჩეულ პარტნიორზე, ხოლო გაეროს მოსახლეობის ფონდი UNFPA სიყვარულის დღეს მნიშვნელოვანი გზავნილის გასავრცელებლად იყენებს. გოგონების ნაადრევი ქორწინების საზიანო პრაქტიკა სრულიად ეწინააღმდეგება იმ ძირითად უფლებას, რომელსაც ვალენტინობის დღე სიმბოლურად გამოხატავს.

წლევანდელი კამპანიის თემაა ვალენტინობის დღეს არ მინდა ყვავილები, მინდა მომავალი. UNFPA თანამშრომლობს ცნობილ ფოტოგრაფ - ვინსენტ ტრემოსთან და მიზნად ისახავს, ყველას აჩვენოს მოზარდი გოგონების ოცნებები და შესაძლებლობები.

"ძალიან მიყვარს ყვავილები, მაგრამ თუ ოდესმე ვინმე დამაყენებს არჩევანის წინაშე, ყვავილები მირჩევნია თუ საკუთარი უფლებები, რა თქმა უნდა, უფლებებს ავირჩევ, ისევე, როგორც უამრავი გოგო ჩვენს პლანეტაზე. ჩვენ გვინდა, რომ საზოგადოებამ მოუსმინოს გოგონებს, რომლებიც ნათელ მომავალსა და დამოუკიდებლობაზე ოცნებობენ. ნუ წავართმევთ მათ უფლებებს. ყვავილებს კი, როგორც ერთი ცნობილი პერსონაჟი ამბობს, თვითონვე იყიდიან. ვალენტინობა შესანიშნავი დღეა ამ ყველაფრის შესახსენებლად, რადგან ნამდვილი სიყვარული თავისი არსით თანასწორია და არავის ჩაგვრას არ მოითხოვს", - ამბობს სალომე ბენიძე, UNFPA Georgia-ს კომუნიკაციის და ადვოკატირების ოფიცერი.

ვინსენტ ტრემო ცოტა ხნის წინ ესტუმრა მოზარდებს ნეპალსა და ერაყში და მათ ხელთ არსებული რესურსების გამოყენებით სასურველი პროფესიის კოსტუმების შექმნა სთხოვა.

წარმოგიდგენთ ვინსენტ ტრემოს ფოტოპროექტს - ვალენტინობის დღეს არ მინდა ყვავილები, მინდა მომავალი

"დეიდაჩემი მკერავი იყო და მითხრა, რომ თუკი კერვას ვისწავლიდი, ყოველთვის შევძლებდი ადამიანების დახმარებას."

ფოტო: Vincent Tremeau

"არ მინდა, რომ უბრალოდ იურისტი გამოვიდე - მინდა, ადამიანის უფლებები დავიცვა."

ფოტო: Vincent Tremeau

"ეს არის შენობა, რომელსაც ავაშენებ, როდესაც მოსულში დავბრუნდები."

ფოტო: Vincent Tremeau

"მამაჩემი ექიმია, მას უნდა, რომ მეც ექიმი გამოვიდე, ამიტომ ჩვენ ერთად ვმუშაობთ ამ მიზნის მისაღწევად."

ფოტოპროექტი სრულად შეგიძლიათ ნახოთ UNFPA Georgia-ს ფეისბუქის გვერდზე.

თქვენი შთაბეჭდილებების გასაზიარებლად და მხარდაჭერის საჩვენებლად შეგიძლიათ გამოიყენოთ ჰეშტეგები: #IDONT #FutureNotFlowers #EndChildMarriage #GlobalGoals