11 მარტს ციფრული ნახატი რეკორდულ ფასად გაიყიდა; JPEG ფორმატის ფაილის ღირებულება კრისტის აუქციონზე $60,25 მილიონად (გადასახადების ჩათვლით $69,3 მილიონად) შეფასდა კრიპტოვალუტის ეკვივალენტში.

ნამუშევარი, სახელწოდებით პირველი 5 000 დღე, ერთი თვის წინ შექმნა გრაფიკულმა დიზაინერმა Beeple-მა (ნამდვილი სახელი მაიკ უინკელმანი), რომელიც ისეთ ცნობილ ბრენდებთან და ადამიანებთან თანამშრომლობს, როგორებიც ლუი ვიტონი, ჯასტინ ბიბერი და კეტი პერი არიან.

ნამუშევარი ერთგვარი კოლაჟია. იგი ხელოვანის მიერ შექმნილ ყველა ნახატს აერთიანებს, რომელსაც უინკელმანი 2007 წლიდან ყოველდღიურად აქვეყნებდა ინტერნეტსივრცეში.

კრისტის აუქციონის სპიკერის, რებეკა რიგელჰოფტის თქმით, ნამუშევრის შესაძენად 33 მონაწილე იბრძოდა. შედეგი კი მესამე უდიდესი სააუქციონო ფასია, რომლითაც ცოცხალი მხატვრის ნამუშევარი შეფასდა.

კოლაჟი თებერვალში ეგრეთ წოდებულ გადაუცვლად ჟეტონად (NFT) იქცა. ამგვარად, ციფრული შესყიდვების კრიპტოგრაფიული დაცვის საშუალება, ბლოკჩეინი, ნამუშევრის შემსყიდველს პროდუქტის ნამდვილობას უდასტურებს და მასზე საავტორო უფლებასაც ანიჭებს. ამიტომ, მიუხედავად იმისა, რომ ციფრული ფაილის ნახვა და ჩამოტვირთვა ნებისმიერ ინტერნეტმომხმარებელს შეუძლია, ვისი კანონიერი მფლობელის კოდირებული ხელმოწერა ნამუშევარზე წაუშლელადაა ასახული.

ამ ფასად ციფრული ნამუშევრის გაყიდვის პრეცედენტი, თავის მხრივ, სფეროს მუშაობაზეც აისახება.

"ამ სფეროში ეს დიდი ბიძგია", — ამბობს კრისტის აუქციონების სპეციალისტი, ნოა დევისი, — "ვფიქრობ, კრისტის აუქციონებზე NFT-ის ნამუშევრების მისაღებად მომავალში უფრო დაძაბული და საინტერესო სანახაობები გველოდება".

რამდენიმე კვირის წინ, მაიამელმა კოლექციონერმა NFT-ად ქცეული 10-წამიანი ვიდეო, რომელიც ასევე Beeple-ის შექმნილი იყო, $6,6 მილიონად გაყიდა. იგივე ვიდეო, სულ რაღაც ოთხი თვის წინ, ოქტომბერში, კოლექციონერმა მხოლოდ $65 ათასად შეიძინა.