ცნობილი ამერიკული სერიალი Brooklyn Nine-Nine (ბრუკლინი 9-9) ფინიშის ხაზს უახლოვდება.

11 თებერვალს ცნობილი გახდა, რომ ეს გახმაურებული სატელევიზიო შოუ მერვე სეზონის გამოსვლის შემდეგ დასრულდება.

"მადლობელი ვარ, რომ შესაძლებლობა მოგვეცა, პერსონაჟებისა და ფანებისთვის ის დასასრული შეგვეთავაზებინა, რომელიც მათ დაიმსახურეს. როდესაც მაიკლ შურთან ერთად საპილოტე სერიაზე ვმუშაობდი, მან თქვა, რომ მთელი ისტორიის მოსაყოლად 153 ეპიზოდი დაგვჭირდებოდა და მართლაც, სწორედ ამდენი ეპიზოდის შექმნა შევძელით", — ამბობს შოუს ერთ-ერთი მთავარი შემოქმედი, დენ გური გამოსამშვიდობებელ განცხადებაში.

ბრუკლინი 9-9, რომლის ძირითადი სიუჟეტიც ბრუკლინის პოლიციის განყოფილებაში ვითარდება, პირველად 2013 წელს გამოჩნდა ეკრანებზე. ამ გახმაურებულ სატელევიზიო შოუში მთავარ როლებს ენდი სემბერგი, მელისა ფუმერო, ანდრე ბრაუერი და სხვები ასრულებენ.

სერიალს მოპოვებული აქვს ოქროს გლობუსის ჯილდო, ხოლო ტელეკომპანია NBC-ზე 9,5 მილიონზე მეტი მაყურებელი ჰყავდა.

ჯერჯერობით ფინალური მერვე სეზონის პრემიერის ზუსტი თარიღი უცნობია, თუმცა ვიცით, რომ მასში სულ ათი ეპიზოდი იქნება, რომლებიც 2021-22 წლებში გამოვა.