ჩაკ პალანიკი ცნობილი ამერიკელი მწერალია, რომელმაც მსოფლიო პოპულარობა რომან მებრძოლთა კლუბის კინო-ადაპტაციის ეკრანებზე გამოსვლის შემდეგ მოიპოვა. დევიდ ფინჩერის გადაღებული Fight Club 1999 წელს გამოვიდა და მასში მთავარი როლები ბრედ პიტმა, ედვარდ ნორტონმა და ჰელენა ბონემ კარტერმა შეასრულეს.

2008 წელს კი პალანიკის რომანის დახრჩობა (Choke) სრულმეტრაჟიანი ეკრანიზაცია გამოვიდა.

ერთი თვის წინ, Kickstarter-ზე პალანიკის კიდევ ერთი რომანის, ძილისპირულის ეკრანიზაციისთვის საჭირო სახსრების ასაკრეფად, ახალი პროექტი შეიქმნა. კიკსტარტერი ე.წ. croudfunding პლატფორმაა, სადაც ყველას შეუძლია განათავსოს პროექტი, რომელსაც ფინანსური დახმარება სჭირდება და მოაგროვოს თანხები მომხმარებლებისგან.

ფილმზე დამოუკიდებელი კინოსტუდია და რეჟისორი ენდი მინგო იმუშავებენ. რეჟისორს აქამდე მხოლოდ შორტებზე უმუშავია, ძილისპირულის ეკრანიზაცია მისთვის პირველი სრულმეტრაჟიანი პროექტი იქნება. მინგოს ერთ-ერთი შორტი რომანსი (უყურეთ აქ) პალანიკის ამავე სახელწოდების მოთხრობის მიხედვითაა გადაღებული. შესაბამისად, ეს პროექტი მათი მეორე კოლაბორაცია იქნება.

იმისთვის, რომ პროექტი კიკსტარტერით დაფინანსდეს, 17 ივნისამდე მომხმარებლებმა მინიმუმ 250 ათასი დოლარი უნდა შეაგროვონ.

ამ წუთისთვის პროექტს 559 დამფინანსებელი ჰყავს და აგროვებული თანხის რაოდენობა $46 331-ს შეადგენს.

პროექტისთვის ნებისმიერი თანხის გადარიცხვა შეიძლება და ყოველი ტრანზაქციისთვის მომხმარებელი სხვადასხვა სახის წამახალისებელს მიიღებს:

• $1-ის გადარიცხვის შემთხვევაში - თქვენ ექსკლუზიურად მიიღებთ ახალ ამბებს ფილმის გადაღების პროცესის შესახებ.
• $15-ს თუ გაიმეტებთ - ძილისპირულის სცენარის PDF ფაილს გადმოგიგზავნიან.
• $25 - ფილმის გამოსვლის შემდეგ მისი ლეგალურად ჩამოტვირთვის საშუალება გექნებათ.
• $30 - თქვენი სახელი ფილმის ბოლოს ტიტრებში გამოჩნდება.
• $40 - გახდებით ფილმის ვირტუალური პროდიუსერი. მიიღებთ მონაწილეობას გამოკითხვებში, სამუშაო ჯგუფი სწორედ ამ გამოკითხვის შედეგების მიხედვით მიიღებს სხვადასხვა გადაწყვეტილებებს.
• $125-ის შეწირვის შემთხვევაში - დაესწრებით ერთ-ერთ სპეციალურ ჩვენებას, ლოს-ანჯელესში, ნიუ იორკში, ოსტინში, ჩიკაგოში, ტორონტოში ან პორტლენდში.
• $200 - ძილისპირულის ხელმოწერილი ეგზემპლარი.
• $500 - მებრძოლთა კლუბის ხელმოწერილი ეგზემპლარი.
• $750 - მეგობართან ერთად დაესწრებით წვეულებას და ფილმის ჩვენებას გადამღებ ჯგუფთან ერთად.
• $1,500 - ისევ მეგობართან ერთად, ერთი დღით ესტუმრებით გადასაღებ მოედანს.
• $2 ათასი - ითამაშებთ ეპიზოდურ როლს.
• $3 ათასი - ეპიზოდურ როლებში თქვენ და თქვენს მეგობარს გადაგიღებენ.
• $5 ათასად - ოდნავ დიდ ეპიზოდურ როლს მოგცემენ.
• $8 ათასი - ფილმის საწყის ტიტრებში პროდუქტის წარმდგენად ჩაგწერენ.
• $10 ათასად - კიკსტარტერის პროდიუსერის ტიტრს მიიღებთ, ეწვევით გადასაღებ მოედანს და ტელეფონზე ფილმის პროდიუსერი და რეჟისორი დაგირეკავენ და გაგესაუბრებიან, ხოლო ფილმის ბოლოს არსებულ ტიტრებში თქვენი ფოტო და შესაბამისი წარწერა იქნება.
• $15 ათასი - თქვენი ბიზნესის რეკლამა/პროდაქტ პლეისმენტი ფილმში.
• $25 ათასი - ტელეფონზე დაგირეკავთ ენდი მინგო, მეგობართან ერთად ეწვევით გადასაღებ მოედანს, რეჟისორის სკამის გვერდით დადგამენ თქვენს სკამს და უკანა მხარეს სახელსა და გვარსაც წააწერენ, მიიღებთ 4 VIP ბილეთს თქვენ მიერ არჩეულ პრემიერაზე, გექნებათ ლანჩი მსახიობებთან და გადამღებ ჯგუფთან, პრემიერაზე წითელი ხალიჩის გავლით შეხვალთ, დაესწრებით დახურულ წვეულებას, ფილმის საწყის ტიტრებსა და ფილმის ოფიციალურ პოსტერზე თქვენი სახელი და გვარი დაიწერება.

სრული ჩამონათვალი პროექტის გვერდზე შეგიძლიათ იხილოთ. გადარიცხეთ სასურველი თანხა, დაეხმარეთ ჯგუფს ახალი და კარგი ფილმის გადაღებაში და მიიღეთ წამახალისებელი საჩუქარი.