Netflix-მა სტრიმინგ სერვისზე პოპულარული სერიალის, The Umbrella Academy-ის, მესამე სეზონი დაამტკიცა. 10-სერიანი სეზონის გადაღებები 2021 წლის თებერვალში, ტორონტოში დაიწყება.

სერიალის მთავარი პერსონაჟების შემსრულებელ მსახიობებს — ელენ პეიჯს, ტომ ჰოპერს, დევიდ კასტანიედას, ემი რეივერ-ლემპმენს, რობერტ შიენს, ეიდენ გალაგერს, ჯასტინ ჰ. მინს, რიტუ არიასა და კოლმ ფიორს — კვლავ ვიხილავთ მესამე სეზონში. ამასთან, ბრუნდება აღმასრულებელი პროდიუსერი, სტივ ბლექმენი.

მას შემდეგ, რაც გასულ წელს სერიალის პრემიერა შედგა ნეტფლიქსზე, იგი პლატფორმაზე მესამე ყველაზე ყურებადი სატელევიზიო შოუ გახდა.

Universal Content Productions-ის წარმოებული The Umbrella Academy ჯერარდ უეის და გაბრიელ ბას შექმნილ Dark Horse-ის კომიქსებზეა დაფუძნებული. შესაბამისად, სანამ ეკრანზე გაცოცხლებულ ისტორიას ვნახავთ, სიუჟეტს უკვე შეგიძლიათ, გაეცნოთ კომიქსების მესამე ტომში — სასტუმრო დავიწყება.

ბლექმენის გარდა, მესამე სეზონზე მომუშავე აღმასრულებელ პროდიუსერებს შორის ჯეფ ფ. კინგია — რომელიც, ამავდროულად, რეჟისორიცაა — ასევე მაიკ რიჩარდსონი, კით გოლდბერგი და ჯესი მაკიუნი. თანაპროდიუსერებად მოგვევლინებიან კომიქსების შემქმნელი უეი და ბაც.

კორონავირუსის პანდემიიდან გამომდინარე, ჯერჯერობით, უცნობია, როდის შეძლებენ გულშემატკივრები საყვარელი სერიალის ახალი სერიების ნახვას, თუმცა ნეტფლიქსის გეგმებიდან გამომდინარე, შეგვიძლია, ვივარაუდოთ, რომ პრემიერის თარიღი მომავალი წლის ზაფხულში იქნება.

თუ სერიალებს თვალს აქტიურად ადევნებ, არ დაგავიწყდეს შემოიხედო ჩვენს ჯგუფშიც – ერთი სერიაც და…