Netflix-მა თავისი ახალი ორიგინალი ანიმაციის, ზევსის სისხლის (Blood of Zeus), ტრეილერი გამოუშვა. ახალი ანიმაცია სტრიმინგის სერვისზე პოპულარული Castlevania-ს გუნდის შექმნილია.

Netflix-ზე შოუს მოკლე მიმოხილვა შემდეგნაირია:

"ოლიმპოს ღმერთებსა და ტიტანებს შორის მოახლოებულ ომში ჰერონი, რომელიც ძველი საბერძნეთის შემოგარენში მცხოვრები ერთი უბრალო უაზნოა, დემონთა ბოროტი ჯარისგან კაცობრიობის გადარჩენის მთავარი იმედი ხდება მას შემდეგ, რაც ის საკუთარი წარსულის საიდუმლოებებს აღმოაჩენს"

ტრეილერის პირველი ნახევარი ექსპოზიციითაა დახუნძლული — უძველესი ომი, შემოჭრილი დემონების ჯარი, დაღუპული გიგანტის ნარჩენების ძიება — ხოლო მისი მეორე ნაწილი შთამბეჭდავად სტილიზებული საბრძოლო კადრების მონაცვლეობებითაა სავსე.

ზევსის სისხლი Netflix-ზე 27 ოქტომბერს გამოჩნდება, მანამ კი შეგიძლიათ, ტრეილერი თავად იხილოთ:

ანიმაციური სერიალი Powerhouse Animation Studios-ის შექმნილია, რომელსაც ასევე Castlevania ეკუთვნის. ეს უკანასკნელი კლასიკური ვიდეოთამაშების სერიის ანიმაციური ადაპტაციაა და პრესაში ხშირად არ გვხვდება ხოლმე, თუმცა ის ნეტფლიქსისთვის საკმაოდ წარმატებული აღმოჩნდა და დროგამოშვებით მის Top 10 ჩარტებშიც იკავებს ადგილს. IndieWire-ის სტივ გრინმა 2017 წელს Castlevania-ს პირველი სეზონი დაახასიათა, როგორც "შემზარავი, სისხლიანი და იმედგამოცლილი".

Netflix და მისი კონკურენტი სტრიმინგის სერვისები ბოლო წლებში ზრდასრულ მაყურებელზე გათვლილ ანიმაციურ სერიალებს უფრო მეტ ყურადღებას უთმობენ. HBO Max-ის ერთ-ერთი პირველი ორიგინალი გამოცემა ამავე კატეგორიაში კომედიური ანიმაცია Close Enough იყო, Hulu-ზე კი ივნისში Crossing Swords-ის პრემიერა შედგა.

ზრდასრულ აუდიტორიაზე გათვლილ უფრო ძველ ანიმაციებს შორისაა BoJack Horseman, რომელსაც ნეტფლიქსზე დიდი ხნის განმავლობაში მაღალი რეიტინგი და კარგი შეფასებები ჰქონდა; აგრეთვე F Is For Family, რომელიც წინა კვირაში ფინალურ მეხუთე სეზონზე განაახლეს.