გართულებების გამო, მოდელმა კრისი ტეიგენმა და მუსიკოსმა ჯონ ლეჯენდმა შვილი დაკარგეს. ორსულობის შეწყვეტის შესახებ წყვილმა სოციალურ მედიაში დაწერა და გულწრფელი შავ-თეთრი ფოტოები გამოაქვეყნა, რომლებიც მათ მდგომარეობას და ტკივილს ასახავს.

როგორც ცნობილია, კრისი თითქმის ერთი თვის განმავლობაში წოლით რეჟიმზე იყო და ექიმები სისხლდენის შეწყვეტას ვერ ახერხებდნენ. ამ დროის განმავლობაში, ის გამუდმებით ისხამდა სისხლს, მაგრამ გაწეული ძალისხმება ნაყოფის გადასარჩენად საკმარისი არ აღმოჩნდა:

"შოკში ვართ და ისეთ ტკივილს განვიცდით, რომელსაც სიტყვებით ვერ აღწერ. ძლიერ ტკივილს, როგორიც აქამდე არ გვიგვრძვნია".

როგორც კრისი წერს, წინა ორი ორსულობის შემთხვევაში, ის და ჯონი შვილს დაბადებამდე სახელს არ ურჩევდნენ, თუმცა ამ შემთხვევაში პირიქით მოხდა:

"ჩემს მუცელში მყოფ არსებას ჯეკს ვეძახდით. ჯეკი მთელი ძალით ეცადა, რომ ჩვენი ოჯახის წევრი ყოფილიყო და ის სამუდამოდ იქნება კიდეც. ძვირფასო ჯეკ, მაპატიე, რომ შენი სიცოცხლის პირველი მომენტები ასეთი რთული იყო, გვაპატიე, რომ ვერ მოგეცით სახლი, რომელიც გადასარჩენად გჭირდებოდა. ყოველთვის გვეყვარები".

წინა ორი შვილი წყვილმა ხელოვნური (ინ ვიტრო) განაყოფიერებით გააჩინა. მესამე შვილის შემთხვევაში, ყველაფერი ბუნებრივად მოხდა. ტეიგენის სიტყვებით, ეს მისთვის წარმოუდგენელი იყო, რადგან სუსტი პლაცენტა ჰქონდა.

"საავადმყოფოდან სახლში ბავშვის გარეშე მივდივარ, როგორ შეიძლება ეს რეალურად ხდებოდეს", — დაწერა მან მოგვიანებით.

ტეიგენს და ლეჯენდს კიდევ ორი შვილი ჰყავთ, ლუნა და მაილსი.

"მადლიერი ვართ იმ საოცარი შეგრძნებებისთვის, რომელსაც ისინი გვანიჭებენ, მაგრამ ყველა დღე ნათელი ვერ იქნება. ჩვენი ცხოვრების ყველაზე ბნელ და საზარელ დღეს ჩვენ ვგლოვობთ, ვტირით, თუმცა ერთმანეთს ვეხუტებით და ვაძლიერებთ, რომ გავუმკლავდეთ".

წყვილს მხარდაჭერა უამრავმა ცნობილმა ადამიანმა გამოუცხადა, მათ შორის იყვნენ რუბი როუზი, კიმ კარდაშიანი, აარონ პოლი, ჩენინგ ტატუმი, პერის ჰილტონი, ვაიოლა დევისი და სხვები. ტვიტერზე მათ მადლობაც გადაუხადეს გულწრფელი პოსტისთვის.

"უამრავი ოჯახი ამ ტრაგედიას სიჩუმეში ატარებს. გული მტკივა ამ ორი ადამიანის გამო და ასევე გაოცებული ვარ მათი სიძლიერით, რომ შეძლეს ტრაგიკული ამბის, მაგრამ ბევრისთვის ნაცნობი ტკივილის ჩვენთვის გაზიარება", — ასე გამოეხმაურა მათ მწერალი ჯილ ფილიპოვიჩი.

ორსულობის შეწყვეტის და მზარდი მკვდრადშობადობის შესახებ რამდენიმე კვლევა აკადემიურ გამოცემებში უკვე გამოქვეყნდა. როგორც ირკვევა, მარტის მიწურულიდან მოყოლებული, პანდემიის დაწყებიდან დღემდე, მკვდრადშობადობის სტატისტიკა 50%-მდე გაიზარდა. ამის მიზეზი კორონავირუსის თანამდევი გართულებები არაა და მისი რეალური მიზეზი ჯანდაცვის გადატვირთულ სფეროში უნდა ვეძებოთ. მას შემდეგ, რაც ჰოსპიტალების უმეტესობამ საკუთარი რესურსი პანდემიასთან ბრძოლისკენ სრულად მიმართა, ორსულობის პერიოდის გეგმიური შემოწმებები მათი ყურადღების მიღმა დარჩა. ამას ამწვავებდა ისიც, რომ ორსულთა უმეტესობა, კორონავირუსით ინფიცირების შიშის გამო, ექიმთან ფიზიკური კონსულტაციისგან თავს იკავებდა.