2020 წელს ისე ხშირად ვიგებთ ერთმანეთზე უფრო დამამწუხრებელ სიახლეებს, რომ პრეისტორიულ ეპოქაში ცხოვრებაც კი შეიძლება ინატროს ვინმემ...

არა, ეხუმრებით ამ იდეას? აი, ქრუდსების ოჯახის თავგადასავალს რომ მიადევნოთ თვალი, თქვენც სერიოზულად დაფიქრდებოდით იმავეზე.

სულ რამდენიმე საათის წინ ცნობილმა ანიმაციურმა სტუდიამ DreamWorks თავის გახმაურებული პროექტის The Croods მეორე ნაწილის პირველი ტრეილერი გამოაქვეყნა, რომელიც ოჯახთან ერთად ისეთი სახალისო დროის გატარებას გვპირდება, როგორიც ამ წელს ყველაზე მეტად გვაკლდა:

"იმ იდეალურ ადგილს ვეძებთ, რომელსაც სახლს დავუძახებთ", — ამბობს ტრეილერში ერთ-ერთი მთავარი პერსონაჟი და მალევე ეს "მსოფლიოს პირველი ოჯახი" მართლაც აღმოაჩენს სამოთხის მსგავს გარემოს, სადაც ყველა მათი სურვილი მარტივად ასრულებადია.

ოღონდ ერთი პრობლემაა... იქ უკვე ცხოვრობს სხვა ოჯახი. მიუხედავად იმისა, რომ თავდაპირველად ეს ორივე ოჯახი ეჭვის თვალით უყურებს ერთმანეთს, როგორც ჩანს, მალე მოვლენები რადიკალურად შეიცვლება და მათი თანაცხოვრება უფრო ჯადოსნური, საინტერესო და სახალისო იქნება, ვიდრე — ცალ-ცალკე ყოფნისას იყო.

ამ ანიმაციური ფილმის პერსონაჟებს ისეთი ცნობილი მსახიობები ახმოვანებენ, როგორებიც არიან ემა სტოუნი, რაიან რეინოლდსი და ნიკოლას ქეიჯი.

ქრუდსების ოჯახის პირველი ნაწილი 2013 წელს გამოვიდა და კრიტიკოსების დადებით შეფასებებთან ერთად (ის იყო ნომინირებული ოსკარებისა და ოქროს გლობუსის დაჯილდოებებზე), კინოგაქირავებაშიც მიაღწია წარმატებას: $135–175-მილიონიანი ბიუჯეტით $587 მილიონის შემოსავლები დააგროვა.

როგორ შოუს შემქმნელები გვპირდებიან, თუ პირველი ანიმაცია ოჯახის მნიშვნელობაზე იყო კონცენტრირებული, The Croods: A New Age ერთიანობის, ურთიერთანამშრომლობის ძალაზე მოგვითხრობს.

მართალია, ყველა დაგეგმილი პრემიერის თარიღი მომავალ წლამდე გადაიდო ან გაუქმდა, მაგრამ DreamWorks პირიქით — გეგმავს, რომ 25 ნოემბერს თითოეულმა ოჯახმა ამ ჯადოსნური ოჯახის ისტორია დიდ ეკრანზე იხილოს და იმედია, მართლაც ყველა მსურველი შეძლებს ამას.