ბიჭების თავგადასავალი გრძელდება.

23 ივლისს Comic-Con გაიმართა, ოღონდ პანდემიის გამო ამ ცნობილ ღონისძიებას მონაწილეები დისტანციურად შეუერთდნენ. მათ შორის იყო Amazon Prime Video-ს გახმაურებული სერიალის The Boys შემოქმედებითი გუნდი და მათ განვლილ ეტაპებსა და სამომავლო გეგმებზე ისაუბრეს.

სერიალის განხილვებში მონაწილეობა მიიღეს მსახიობებმა კარლ ურბანმა, ჯეკ ქუეიდმა, ენტონი სტარმა, ერინ მორიარტმა და სხვებმა. შეხვედრის ბოლოს კი აღმასრულებელმა პროდიუსერებმა სეთ როგენმა და ივენ გოლდბერგმა დააანონსეს, რომ სერიალი მესამე სეზონით გაგრძელდება.

"ერიკ კრიპკე და The Boys-ის შესანიშნავი სამსახიობო გუნდი გააგრძელებს მოულოდნელი და სიურპრიზებით სავსე შოუს შექმნას, რომელიც ისეთი აუცილებლად სანახავი დეტალებით იქნება კვლავაც სავსე, რამაც ეს სერიალი თავიდანვე მსოფლიო ჰიტად აქცია. თავადაც ერთი სული გვაქვს, რომ გავიგოთ, თუ როგორ განვითარდება ყველაფერი მესამე სეზონში", — განაცხადა Amazon Studios-ს წარმომადგენელმა.

The Boys

ფოტო: Amazon Prime Video

შავი იუმორით, პოლიტიკური სატირითა და თვითირონიული სიუჟეტური ხაზით გამორჩეული ეს სერიალი ამავე სახელწოდების მქონე კომიქსების სერიის მიხედვით გადაიღეს, რომელიც ჩვენს წარმოსახვაში არსებულ სუპერგმირებს სრულიად სხვა კუთხით გვაჩვენებს. პირველი სეზონის პრემიერა 2019 წელს შედგა და მილიონობით მაყურებლის ყურადღება მალევე მიიქცია.

ორი კვირის წინ გამოვიდა შოუს მეორე სეზონის პირველი ტრეილერიც. მეორე სეზონის პრემიერა 4 სექტემბერსაა დაგეგმილი: Amazon-ის ჩვეული სტრატეგიის მიხედვით, პრემიერის დღეს ერთდროულად სამი ეპიზოდი გამოვა, ყოველ მომდევნო პარასკევს კი თითო სერიას გამოუშვებენ. სეზონში სულ რვა ეპიზოდია და მისი ფინალი 9 ოქტომბერს შედგება.

ამაზონს შექმნილი ვითარების გამო ჯერჯერობით უჭირს ზუსტი თარიღის თქმა, თუ როდის დაიწყება მესამე სეზონის გადაღებები, მაგრამ, რაც მთავარია, ვიცით, რომ ისტორიის გაგრძელებას ვიხილავთ.

მანამდე კი შეგიძლიათ Comic Con-ზე The Boys-ის წლევანდელ პანელს მიადევნოთ თვალი: