რუსეთის სამეფო კარის ინტრიგები გრძელდება.

15 მაისს ახალი სატელევიზიო შოუ The Great-ის პრემიერა შედგა და გამოსვლიდან ორ თვეზე ნაკლებ დროში ცნობილი გახდა, რომ სერიალის მეორე სეზონი დაამტკიცეს.

ეს ისტორიული სატირა რუსეთის იმპერატორის, ეკატერინე მეორის განვლილ გზაზე მოგვითხრობს: როგორ გახდა გარიყული გოგო ერთ-ერთი ყველაზე ძლიერი მმართველი რუსეთის ისტორიაში.

სერიალში მთავარ როლს ელ ფენინგი ასრულებს, მას პარტნიორობას კი ნიკოლას ჰოლტი უწევს: ის ეკატერინეს ქმარს, პეტრე მესამეს განასახიერებს. მათთან ერთად შოუში მონაწილეობენ ფიბი ფოქსი, ადამ გოდლი და გუილიმ ლი.

ნიკოლას ჰოლტი სერიალში The Great.

ფოტო: Hulu

აღსანიშნავია, რომ სერიალის სცენარისტი და მთავარი პროდიუსერი ტონი მაკნამარაა, რომელმაც მანამდე იორგოს ლანთიმოსის ასევე ისტორიული სატირის The Favourite-ის სცენარზე იმუშავა და ოსკარის ნომინაციაც მიიღო.

ახალმა სერიალმა The Great სპეციფიკური შავი იუმორის მიუხედავად მაინც მოახერხა, რომ მაყურებლების გული მოეგო: შოუმ ძირითადად დადებითი შეფასებები დაიმსახურა, რასაც თუნდაც ის ფაქტი მოწმობს, რომ IMDB-ზე მისი რეიტინგი 8,1-ია, Rotten Tomatoes-ზე კი 88%-ით დადებითი შეფასებები დაიმსახურა.

ისღა დაგვრჩენია, დაველოდოთ, თუ რამდენად ღირსეულ გაგრძელებას შემოგვთავაზებენ შოუს შემქმნელები. თუმცა, თუ გავითვალისწინებთ იმ ფაქტს, რომ პანდემიის გამო კინო და სატელევიზიო წარმოება თითქმის მთლიანად შეჩერებულია, ალბათ, დიდხანს მოგვიწევს ლოდინი.

ფოტო: Giphy