ესპანეთის ხელოვნების კონსერვაციის ასოციაციის ექსპერტები ხელოვნების ნიმუშების რესტავრაციის უფლების მიღებაზე კანონის გამკაცრებას ითხოვენ. სპეციალისტების ბრაზი ამჯერად ბაროკოს სტილში შესრულებული ღვთისმშობელი მარიამის ნახატის რესტავრაციამ გამოიწვია.

ბარტოლომე ესტებან მურილიოს მე-17 საუკუნის ნამუშევარმა განახლების პროცესში მთლიანად დაკარგა პირვანდელი სახე. ნახატის აღსადგენად კოლექციონერმა 1 200 ევრო გადაიხადა, თუმცა დაქირავებულმა "სპეციალისტებმა" ის ისე შეცვალეს, რომ პირვანდელი სახე სრულად დაიკარგა და ვერც მომდევნო მცდელობების შემდეგ შეძლეს მისი აღდგენა.

ფოტო: EUROPA PRESS

თვითმარქვია რესტავრატორის მიერ ხელოვნების ნიმუშის დაზიანების შემთხვევა ესპანეთში პირველი არაა. 2018 წელს ადგილობრივ ეკლესიაში მეთექვსმეტე საუკუნის წმინდა გიორგის ხატის რესტავრაცია არაპროფესიონალს მიანდეს და ეს შედეგი მიიღეს.

ფოტოში ჩანს მებრძოლის ტრანსფორმაცია — "თანამედროვე ვერსიას" ვარდისფერი სახე და ფერადი მუზარადი აქვს.

2012 წელს კი, ასევე ესპანეთში, იესო ქრისტეს ხატის რესტავრაცია ასეთი შედეგით დასრულდა.

"არ მგონია ამ ადამიანებს რესტავრატორებთან რამე საერთო ჰქონდეთ. ისინი ყველაფერს ანადგურებენ", — აცხადებს ესპანეთის პროფესიონალ რესტავრატორთა ასოციაციის ყოფილი პრეზიდენტი და დასძენს, რომ ახლანდელი კანონი ადამიანებს უფლებას აძლევს თავისი უნარ-ჩვევების დამტკიცების გარეშე ჩაერთონ ნახატის განახლების პროცესში.