ფეისბუქის მომხმარებელი ნიკო ქელბაქიანი საკუთარ პროფილზე გულისამაჩუყებელ ამბავს ყვება. მისი მიხედვით, ოჰაიოში მცხოვრებ ამერიკელ კაცს, რომელსაც ლეიკემიის გამო რამდენიმე კვირის სიცოცხლე აქვს დარჩენილი, ქართული კერძები უნატრია.

ამის შესახებ პოსტი თავდაპირველად ცნობილ ჯგუფში, Spend 4 Seasons in Georgia ნიკოს მეგობარმა, ფილიპმა გამოაქვეყნა და ჯგუფის წევრებს, რომლებიც ოჰაიოში ცხოვრობდნენ, ქართული კერძების მომზადებაში სთხოვა დახმარება. როგორც მოსალოდნელი იყო, ამერიკაში მყოფმა ქართველებმა დახმარების სურვილი გამოთქვეს. საბოლოოდ უკანასკნელი სურვილის ახდენაში მონაწილეობის სურვილი ამერიკაში საქართველოს საელჩომ და ელჩმა, დავით ბაქრაძემაც გამოთქვეს.

ნიკოს პოსტიდან ირკვევა, რომ მზარეული და დელეგაცია ვაშინგტონიდან დეიტონში ჩავიდნენ, რისთვისაც 8-10 საათი გაიარეს, რადგან პანდემიის გამო ფრენები კვლავ შეჩერებულია. ამბის დასასრულს ის საკუთარ ფეისბუქზე ასე ყვება:

"საელჩოდან დაუკავშირდნენ, ელჩი დავით ბაქრაძე შეჰპირდა საელჩოს მზარეულის გაგზავნას. ხოდა, დღეს აი, ასეთი ლამაზი სუფრა გაშალეს ნიგვზიანი ბადრიჯნებით, შქმერულით, ტარხუნის ლიმონათით, ქართული ღვინით და კიდევ ბევრი რამერუმით".

როგორც ხედავთ, როცა საქმე სოლიდარობას, სიკეთესა და ქართულ მასპინძლობას ეხება, ხელისშემშლელი ფაქტორი პანდემიაც კი არ შეიძლება რომ იყოს.