წელს დაგეგმილ სატელევიზიო პრემიერებს შორის Lovecraft Country ის ერთ-ერთი გამორჩეული ახალი პროექტია, რომლის ხილვასაც მაყურებლები განსაკუთრებულად ელოდებიან.

სერიალს HBO ამერიკელი მწერლის მეთ რაფის ამავე სახელწოდების მქონე ცნობილი წიგნის მიხედვით იღებს, რომელშიც საშინელებათა ჟანრის კლასიკოსის, ჰოვარდ ლავკრაფტის სამყაროს ელემენტებით აშშ-ში რასიზმის სისასტიკეა გაცოცხლებული.

ამ ახალი სატელევიზიო შოუს პირველი ტრეილერის ნახვა და პირველი შთაბეჭდილებების მიხედვით მომავალში არგამოსატოვებელი სერიალების სიაში მისი დამატება მაყურებლებს უკვე შეუძლიათ:

Lovecraft Country-ის ოფიციალური სინოფსისი ასეთია:

"სერიალი ატიკუს ფრიმენის შესახებ მოგვითხრობს, რომელიც მეგობართან და ბიძასთან ერთად დაკარგული მამის მოძებნას 1950-იანი წლების ამერიკაში იწყებს. სწორედ აქედან იწყება მათი ბრძოლა გადარჩენისთვის ერთდროულად რასისტული ტერორისგან და ლავკრაფტის წიგნებიდან გაცოცხლებული შემზარავი მონსტრებისგან".

სერიალის აღმასრულებელი პროდიუსერი მიშა გრინია, რომელსაც მანამდე ისეთი ცნობილი სატელევიზიო შოუების შექმნაში მიუღია მონაწილეობა, როგორებიცაა Sons of Anarchy და Heroes. მასთან ერთად ამ ახალი შოუს შექმნაში მონაწილეობას იღებდნენ Get Out-ის რეჟისორი ჯორდან პილი და Lost-ს პროდიუსერი ჯეი ჯეი აბრამსი.

HBO-ს პრემიერის თარიღი ჯერ კიდევ არ გაუმხელია, თუმცა სერიალის ხილვას მაყურებლები წლის ბოლომდე შეძლებენ.