ტელეარხმა NBC-მ რამდენიმე საათის წინ დააანონსა, რომ ცნობილი სიტკომი Parks and Recreation ეკრანზე ერთი სპეციალური ეპიზოდით დაბრუნდება.

ეპიზოდის პრემიერა 30 აპრილს შედგება და მასში შოუს ყველა კარგად ნაცნობ მსახიობს ვიხილავთ: ემი პოლერი, რაშიდა ჯონსი, აზიზ ანსარი, ნიკ ოფერმანი, ობრი პლაზა, კრის პრატი, ადამ სკოტი, რობ ლოუი და ჯიმ ო'ჰერი.

ახალი ეპიზოდი საქველმოქმედო მიზნებისთვის შეიქმნა: მისგან შემოსული თანხა მთლიანად კორონავირუსის პანდემიისგან დაზარალებული ადამიანების დასახმარებელ საქველმოქმედო ფონდს გადაერიცხება.

"სხვა ბევრი ადამიანის მსგავსად, ჩვენც ვცდილობდით რაღაც გზა გამოგვეძებნა, რომელიც მსახიობების კვლავ გაერთიანებასთან ერთად შემოწირულობების შეგროვებაშიც დაგვეხმარებოდა. მსახიობებს ამ იდეის შესახებ ელექტრონულ ფოსტაზე მივწერე და მათგან დასტური 45 წუთის შუალედში მივიღე: Parks and Rec-ის გუნდი კვლავ ერთად იქნება ახალ 30-წუთიან ეპიზოდში და იმედია, ყველა ისიამოვნებთ. და თანხას ქველმოქმედებას შეწირავთ!", — განაცხადა შოუს შემქმნელმა, მაიკლ შურმა.

ამ ახალ სპეციალურ ეპიზოდს უსაფრთხოების დაცვით მსახიობების პირად სახლებში გადაიღებენ. შესაბამისად, სცენარი, ალბათ, კარანტინში ამ ცნობილი პერსონაჟების მეგობრებთან თუ კოლეგებთან დაკავშირების სხვადასხვა სახალისო ხერხებზე იქნება.

Parks and Recreation ეკრანებზე პირველად 2009 წელს გამოჩნდა და 2015 წლამდე შვიდი სეზონის განმავლობაში მილიონობით მაყურებლის გულთან ერთად არაერთი ოქროს გლობუსისა თუ ემის ჯილდოც მოიგო.

ასევე იხილეთ: