მას შემდეგ, რაც 2019 წელს არაერთი საინტერესო საშინელებათა ჟანრის ფილმი ვიხილეთ, იქნება ის არი ასტერის Midsommar თუ ჯორდან პილის Us, 2020 წელსაც მნიშვნელოვან სიახლეებს უნდა ველოდოთ ჟანრულ კინოში.

უკვე ვიცით, რომ წელს ვიხილავთ საოცრად დამაინტრიგებელი სიუჟეტის მქონე ფილმს Invisible Man, რომელშიც მთავარ როლს ელიზაბეტ მოსი ასრულებს; ასევე მარტში შედგება უკვე ბევრისთვის ფავორიტი ფილმის, A Quiet Place-ის მეორე ნაწილის პრემიერა.

საშინელებათა ჟანრის მოყვარულებისთვის წელს აუცილებლად სანახავი ფილმების სიას კი Vivarium-იც შეემატა, რომლის ტრეილერიც ცოტა ხნის წინ გამოქვეყნდა.

ფილმის სიუჟეტი ბედნიერი წყვილის ირგვლივ ვითარდება, რომელიც საცხოვრებლად იდეალურ სახლს გარეუბანში ეძებს. მათი ერთი შეხედვით ეს ჩვეულებრივი სურვილ ნამდვილ ჯოჯოხეთად გადაიქცევა: წყვილი იდენტურად ერთნაირი სახლებით აგებულ დასახლებას თავს ვეღარ დააღწევს და ერთგვარ ლაბირინთში ჩაიკეტება.

სამეცნიერო ფანტასტიკის, საშინელებათა ჟანრისა და თრილერის ელემენტების მქონე ამ ფილმში მთავარ როლებს The Social Network-ისა და Zombieland-ის მსახიობი, ჯესი აიზენბერგი და Green Room-ის ვარსკვლავი, იმოგენ პუტსი ასრულებენ. ფილმი ირლანდიელმა რეჟისორმა, ლორკენ ფინეგანმა გადაიღო.

Vivarium-ის პრემიერია 2019 წლის კანის კინოფესტივალზე შედგა, კინოთეატრებში მაყურებლები მის ხილვას კი ამ წლის მარტიდან შეძლებენ.