პოპვარსკვლავი ბილი აილიში ჯეიმს ბონდის ახალი ფილმის, No Time To Die-ის საუნდტრეკს შეასრულებს. 18 წლის ამერიკელი მომღერალი ყველაზე ახალგაზრდა მუსიკოსია, რომელსაც ჯეიმს ბონდის მუსიკაზე უმუშავია.

"დაუჯერებელია, რომ ამ ყველაფრის ნაწილი ვარ", – განაცხადა ბილიმ, – "ჯეიმს ბონდი ყველაზე მაგარი ფრენჩაიზია კინოს ისტორიაში".

ჯეიმს ბონდის წინა ორმა საუნდტრეკმა ოსკარი დაიმსახურა (ადელის Skyfall და სემ სმიტის Writing's On The Wall).

ბილი აილიში მუსიკაზე თავის ძმასთან, ფინეას ო'კონელთან ერთად იმუშავებს.

"ბონდის ფილმისთვის მუსიკის დაწერა ისეთი რამაა, რაზეც ორივე მთელი ცხოვრების განმავლობაში ვოცნებობდით", - თქვა ფინეასმა.

ფილმის პროდიუსერების თქმით, აილიშის ემოციური შესრულება ფილმის საერთო განწყობასთან თანხვედრაში იქნება.

ფილმის რეჟისორმა, კერი ფუკუნაგამ აღიარა, რომ ბილისა და ფინეასის ფანია: "ბონდის საუნდტრეკზე მუშაობა მხოლოდ ერთეულების ხვედრია. ერთი სული მაქვს, როდის მოისმენს ფართო საზოგადოება ახალ ნამუშევარს: მათ სრულიად ახალი პერსპექტივა შემოიტანეს, რომელიც თაობებს დარჩება".

No Time To Die დენიელ კრეიგისთვის ბონდის როლში ბოლო ფილმი იქნება. ფილმის საწყისი სცენები იამაიკაზეა გადაღებული, სადაც პენსიაზე გასული ჯაშუში ისვენებს. რა თქმა უნდა, მას მშვიდი ცხოვრება არ დასცალდება.

ფილმის პრემიერა აპრილში შედგება.