ჰოლივუდის ყოფილმა პროდიუსერმა New York Post-თან ინტერვიუში ნამდვილად ბევრი ილაპარაკა, მაგრამ მის სიტყვებს უამრავი ადამიანი არ ეთანხმება. მას შემდეგ, რაც 80-ზე მეტმა ქალმა სექსუალურ შევიწროებაში, თავდასხმაში, გარყვნილებასა და სხვა ქმედებებში დაადანაშაულა, ის ამბობს, რომ საკუთარი თავი ებრალება.

უფრო ზუსტად კი, ჰარვი ვაინშტაინი მიიჩნევს, რომ ქალებისგან დაუფასებელია, რადგან მისი სიტყვებით უამრავ რეჟისორ ქალს ფილმების გადაღებაში დაეხმარა.

"ქალ რეჟისორებთან ერთად ნებისმიერ კინოშემქმნელზე მეტი ფილმი ვაწარმოე და მე ჯერ კიდევ 30 წლის წინანდელ დროზე ვსაუბრობ. არა აწმყოზე, რადგან ახლა ეს მოდურია. მე პირველი ვიყავი! ქალებს გზა გავუკაფე!"

67 წლის ვაინშტაინი თავს მივიწყებულად მიიჩნევს:

"მე ვფიქრობ, რომ მივიწყებული კაცი ვარ. ჩემი ღვაწლი გადაიფარა ბოლო ამბების შემდეგ. ჩემი შემოქმედება დაივიწყეს".

სექსუალურ ძალადობასა და გაუპატიურებაში ბრალდებული ვაინშტაინი ნიუ-იორკ პოსტმა მას შემდეგ ჩაწერა, რაც მან ხერხემლის ოპერაცია გაიკეთა. ვაინშტაინს ბრალდებებზე არ უსაუბრია, თუმცა თქვა, რომ სურს დაიმახსოვრონ იმით რაც წარსულში იყო და არა იმით, რაც მომავალში გახდა.

რამდენიმე დღის წინ, ვაინშტაინის ადვოკატმა განაცხადა, რომ მბრალდებლებთან $25-მილიონიანი შეთანხმება შესაძლოა შედგეს და დასძინა, რომ მისი კლიენტი ბრალს არ აღიარებს. მბრალდებლების ადვოკატმა სავარაუდო შეთანხმებას, რომელსაც სასამართლო ჯერ არ დათანხმებულა, შემზარავი უწოდა.

ჰარვი ვაინშტაინის სასამართლო, სადაც მას რამდენიმე სექსუალურ დანაშაულისთვის წარუდგენენ ბრალს, მათ შორის გაუპატიურებისთვის, იანვარში გაიმართება.