როგორც უკვე იცით, 27 ნოემბრიდან ლეგენდარული რეჟისორის, მარტინ სკორსეზეს უახლესი ფილმის ნახვა ნეტფლიქსზე შეგიძლიათ.

The Irishman მარტინ სკორსეზეს ნეტფლიქსთან თანამშრომლობის პროდუქტია, რომელიც რეჟისორის შემოქმედებაში ყველაზე ხანგრძლივი ქრონომეტრაჟის მქონე კინოსურათია — ფილმი 3 საათსა და 29 წუთს გრძელდება.

ამის გამო ბევრი ხუმრობდა, რომ საავტორო კინოს რეჟისორი ნეტფლიქსის სტანდარტებს მოერგო: სატელევიზიო შოუების ერაში ნეტფლიქსი სწორედ სერიალებითაა ცნობილი, ირლანდიელი კი თავისი ხანგრძლივობით სტანდარტული სერიალის კრიტერიუმებს უფრო აკმაყოფილებს, ვიდრე დამოუკიდებელი კინოსას.

ცნობილია ისიც, რომ ნეტფლიქსის მომხმარებლები სასურველ ფილმს, სერიალსა თუ სხვა გასართობ შოუს ხშირად მობილური აპლიკაციის საშუალებით ანდროიდებში უყურებენ. ეს ფაქტი უცნობი არ არის არც მარტინ სკორსეზესთვის, რომელიც საკმაოდ კონსერვატული შეხედულებისაა კინოსთან დაკავშირებული საკითხების მიმართ, შესაბამისად მან თავის მაყურებლებს სპეციალური რჩევაც მისცა, თუ როგორ უნდა ნახონ მისი ახალი ფილმი:

"მინდა გირჩიოთ, რომ თუ ოდესმე მოგინდებათ ჩემი ფილმების ნახვა, გთხოვთ, არასდროს ნახოთ ტელეფონში. აი, აიპედში, მოზრდილი ეკრანის მქონე აიპედში კიდევ შეიძლება."

რეჟისორი იმასაც აცნობიერებს, რომ მისი ახალი ფილმი, ირლანდიელი უჩვეულო ხანგრძლივობისაა, რაც მაყურებელს აიძულებს სპეციალური გეგმა შეიმუშავოს, თუ როგორ უნდა ნახოს ფილმი:

"იდეალურ შემთხვევაში კარგი იქნება, თუ ამ ფილმს კინოთეატრში ნახავთ თავიდან ბოლომდე შეუწყვეტლივ. ვიცი, რომ ეს საკმაოდ ხანგრძლივი ფილმია: ტუალეტში გასვლა შეიძლება მოგინდეს, ფეხით გავლა და ასე შემდეგ, მაგრამ სახლში ნახვისას თუ მას ერთ საღამოს ან ღამეს დაუთმობთ ისე, რომ სხვა აქტივობებით არ შეწყვეტთ ყურების პროცესს, მაშინ ასეც ისიამოვნებთ და შესაბამის შედეგსაც მიიღებთ."

ასევე იხილეთ: