ბრიტანელი სტივ და ლენკა ტომსონები ადგილობრივი ლატარიის, EuroMillions-ის 105 მილიონი ფუნტი სტერლინგის ოდენობის ჯეკპოტის მფლობელები გახდნენ. უფრო ზუსტად კი £105 100 701-ის, რაც 135 115 885 დოლარის ეკვივალენტია. ეს გაერთიანებული სამეფოს ლატარიის ისტორიაში რიგით მეცხრე უდიდესი ჯეკპოტია.

წყვილმა დიდი პრიზი ლატარიის 25 წლის იუბილეზე, 19 ნოემბერს მოიგო. სტივმა, რომელიც პროფესიით მშენებელია და ასევე მაღაზიაში კონსულტანტადაც მუშაობს, ხუთივე იღბლიანი ციფრი — 8, 10, 15, 30 და 42 — გამოიცნო.

"როდესაც მივხვდი რომ ყველა რიცხვი დაემთხვა, კანკალი დამეწყო. ვიცოდი, რომ დიდი თანხა მოვიგე, მაგრამ არ ვიცოდი რა მექნა. გარეთ გავედი, ჩემს სატვირთოში ჩავჯექი, მერე უკან გავბრუნდი, მეზობლის კარზე დაკაკუნებას ვაპირებდი, მაგრამ კვლავ მანქანაში დავბრუნდი. გულის შეტევამდე ბევრი არ მაკლდა", — ამბობს სტივი.

მიუხედავად დიდი მოგებისა, სტივი კვლავ აპირებს მუშაობის გაგრძელებას. მისი სიტყვებით, შობამდე უამრავი საქმე აქვს დასასრულებელი და კლიენტებისთვის იმედების გაცრუებას არ აპირებს:

"როცა შოკი გადამივლის, მუშაობას გავაგრძელებ. არ ვარ იმ ტიპის ადამიანი, რომელსაც შეუძლია იჯდეს და არაფერი აკეთოს. ჩემმა დამსაქმებელმა იცის, რომ ჩემი იმედი ყოველთვის შეუძლია ჰქონდეს".

თუმცა, სტივი დროებით პაუზას აიღებს, რომ ამჯერად საკუთარი ოჯახისთვის ააშენოს სახლი, რომელიც წინაზე უფრო დიდი იქნება.

ლენკა და სტივ ტომსონები

ფოტო: PA MEDIA

ლენკას თქმით, თავდაპირველად ეგონა, რომ 105 მილიონი ფუნტის ნაცვლად, 105 ათასი ფუნტი მოიგო, რაც ასევე დიდი მოგება იყო, თუმცა ბევრად ჩამოუვარდებოდა ნამდვილ პრიზს. ის აპირებს, რომ სლოვაკეთში ოჯახის წევრები მოინახულოს და მათზე იზრუნოს, შემდეგ კი თბილ ქვეყნებში დასასვენებლად გაეშუროს.

სტივისა და ლენკას სამ შვილს კი სხვა სურვილები აქვს: უფროს ბიჭს საკუთარი ოთახი ექნება, მის ძმას Tesla სურს, უმცროსი გოგონა კი ვარდისფერ iPhone-ს ელოდება.

ოჯახი პატარა სანაპირო ქალაქ სელსიში ცხოვრობს. ისინი იქ დარჩენას და მეგობრებისა და მოქალაქეების დახმარებას აპირებენ.