Baby It’s Cold Outside უამრავი ადამიანის საყვარელი ძველი საშობაო სიმღერაა, რომელიც 1944 წელს დაიწერა და დიდი ხნის განმავლობაში არ კარგავდა პოპულარობას, თუმცა, სიმღერის ტექსტი მუდამ რჩებოდა საკამათო თემად.

სიმღერა ხელმეორედ ჩაწერა ამერიკელმა მუსიკოსმა და მომღერალმა ჯონ ლეჯენდმა კელი კლარკსონთან ერთად. მისი შეცვლილი ტექსტი ნატაშა როთველს ეკუთვნის. სიმღერა ლეჯენდის განახლებულ საშობაო ალბომში შევიდა.

Baby It’s Cold Outside-ს ქალისა და კაცის დუეტი ასრულებს, მისი შინაარსი მუდამ იყო კონტროვერსული, თუმცა განსაკუთრებული კრიტიკა #MeToo-ს ეპოქაში შეხვდა. სიმღერის ტექსტის მიხედვით, კაცი ქალს დაჟინებით სთხოვს, რომ ღამე მის სახლში გაატაროს, რადგან გარეთ ცივა. ქალი კი უამრავ მიზეზს პასუხობს, რატომაც არ შეუძლია, რომ დარჩეს.

ბოლო წლებში სიმღერის ტექსტი კიდევ ერთხელ გააკრიტიკეს და ის პაემანზე გაუპატიურების შემთხვევების სცენარს შეადარეს. ამის მთავარი მიზეზი ის მონაკვეთია, სადაც ქალი კაცს ეკითხება "Say, what’s in this drink?" [მითხარი, რა არის სასმელში?]

ახალ ვერსიაში არის ისეთი ფრაზები, როგორიცაა "ჩემს მეგობრებსაც დავპატიჟებ" და "შენი სხეული შენი არჩევანია". სახლში დაჟინებით დატოვების მცდელობის ნაცვლად კი, ლეჯენდისა და კლარკსონის შესრულებაში კაცი ქალს ტაქსის გამოძახებას სთავაზობს.

2018 წელს, სექსუალური შევიწროების წინააღმდეგ დაწყებული კამპანიების პარალელურად, ამერიკის რადიოებმა სიმღერა ბადიდან მოხსნეს, რაც დინ მარტინის შვილმა გააკრიტიკა:

"ეს უბრალოდ საყვარელი საშობაო სიმღერაა, ფლირტის ელემენტებით. მამაჩემი რომ ამას შესწრებოდა, ალბათ გაგიჟდებოდა".

სიმღერას წარსულშიც აკრიტიკებდნენ, თუმცა არიან ისინიც, ვინც მის შინაარსს მეორე მხრიდან ხედავენ. 2018 წელს Variety-ში გამოქვეყნებულ სტატიაში მწერალი კრის ვილმენი წერს, რომ სიმღერის შინაარსი იმ ეპოქაში დამახასიათებელ შეზღუდვებს ასახავდა, როცა ქალების მხრიდან სექსუალურობის გამომჟღავნება დაუშვებლად მიიჩნეოდა.

"ესაა ისტორია ქალზე, რომელიც ბრძოლობს — არა კაცთან, რომელმაც "არას" მნიშვნელობა არ იცის, არამედ საზოგადოების მოლოდინთან, რომელსაც თანხმობის მიღება არ უყვარს".

სიმღერა ამერიკელმა კომპოზიტორმა ფრენკ ლესერმა დაწერა. ის ისეთმა ვარსკვლავებმა შეასრულეს, როგორებიც არიან ელა ფიცჯერალდი, ლუის არმსტრონგი, დინ მარტინი, ლედი გაგა და ტომ ჯონსი.