Royal Swinkels Family Brewers-მა ლუდსახარში არგოს 40% შეისყიდა, რითაც ლუდის წარმოების ქართულ ბაზარზე თავისი წილი 15%-მდე გაზარდა. როგორც არგოში ამბობენ, პირველი პირდაპირი ევროპული ინვესტიცია ქართულ კვების ინდუსტრიაში.

ფოტო: არგო

30 ოქტომბერს, 12 საათზე კი ლუდსახარშ არგოს ქარხანაში ხელშეკრულებაზე ხელის მოწერის ოფიციალური ცერემონიალი გაიმართა. როიალ სვინკელების ლუდსახარშმა ბრენდ ჰოლანდიას წარმოების ლიცენზია არგოს 2017 წელს გადასცა. ყველაზე წარმატებულ ქართულ ლუდის საწარმოში წილის შესყიდვითა და მრავალმილიონიანი ინვესტიციით კი ადგილობრივი წარმოების კიდევ უფრო მეტად ზრდის, დაჩქარებისა და განვითარების სურვილს გაუსვა ხაზი. სვინკელების ოჯახი ქართულ ლუდსახარშ ბაზარზე დიდი გეგმებით შემოდის - საქართველო მათთვის ერთ-ერთ მთავარ საწარმოო ქვეყანად უნდა იქცეს.

ფოტო: არგო

ფოტო: არგო

2017 წლის შემდეგ სრულად მოხდა ქარხნის გადაიარაღება, დაინერგა ახალი ტექნოლოგიები და მოხდა საწარმო პროცესის სრული ავტომატიზაცია. როიალ სვინკელების ლუდსახარშის წარმომადგენლები აქტიურად ჩაერთვებიან არგოს ქარხნის განვითარებისა და მოდერნიზაციის პროცესში. ხელის მოწერის ოფიციალურ ცერემონიალს სვინკელების ოჯახის წარმომადგენლები, კომპანია არგოს გენერალური მენეჯერი ვასილ სულხანიშვილი, თემურ ჭყონია, ქალაქის მერი კახი კალაძე, ეკონომიკის მინისტრი ნათია თურნავა და სხვა სტუმრები დაესწრნენ. შეკრებილ სტუმრებს ეზოში სხვადასხვა ლუდის ბარები და ცოცხალი მუსიკაც დახვდათ.

"ქართული ბაზარი ჩვენთვის ნამდვილად აღმოჩენაა და დიდ პოტენციალს ვხედავთ ჩვენი ბრენდებისთვის. ქვეყნის მდებარეობა ევროპა-აზიის გასაყარზე ნამდვილად დიდ პოტენციალს იძლევა ექსპორტისთვის, რაც ჩვენთვის პრიორიტეტულია. ამ წილის შესყიდვით ვადასტურებთ არგოსთან წარმატებულ ურთიერთობას და ვიმედოვნებთ, რომ მომავალში კიდევ უფრო გავაფართოვებთ ურთიერთობებს და ერთად ავითვისებთ ახალ ბაზრებს", — თქვა პირ სვინკელსმა, Royal Swinkles Family Brewers-ის აღმასრულებელმა დირექტორმა.

ფოტო: არგო

"ჩვენი შეთანხმება Royal Swinkels Family-სთან, ნამდვილად ძალიან მნიშვნელოვანია, ამ ურთიერთობის საფუძველზე, ჩვენი როლი ქართული ლუდის ბაზარზე კიდევ უფრო გაიზრდება, ასევე შევძლებთ ავითვისოთ დამატებითი საექსპორტო ბაზრები. ჰოლანდიელების მიერ განხორციელებული მრავალმილიონიანი ინვესტიცია მნიშვნელოვანია ქართული ეკონომიკისთვისაც", — აღნიშნა არგოს გენერალურმა მენეჯერმა, ვასილ სულხანიშვილმა.

"არგო ერთადერთი ლუდსახარშია, რომელიც თბილისის ტერიტორიაზე მდებარეობს, ამჟამად აქ 330-ზე მეტი ადამიანია დასაქმებული და განხორციელებული მრავალმილიონიანი ინვესტიციისა და წარმოების გაფართოების შემდეგ კიდევ უფრო მეტი ადამიანის დასაქმება იგეგმება. ქალაქის განვითარებითვის მნიშვნელოვანია წარმოების ხელშეწყობა და უცხოელებისთვის კომფორტული საინვესტიციო გარემოს შექმნა", — ეკონომიკის მინისტრმა ნათია თურნავამ.