ნიუ-იორკში მდებარე დაუნთაიმ ბარში დამწყები ხელოვანებისთვის მიძღვნილ ღონისძიებაზე ჰოლივუდის ყოფილი გავლენიანი პროდიუსერი, ჰარვი ვაინშტაინი გამოჩნდა. ვაინშტაინი შოუბიზნესში მოღვაწე ასზე მეტმა ქალმა დაადანაშაულა სექსუალურ შევიწროებასა და ძალადობაში და მის საქმეს ლონდონის, ნიუ-იორკისა და ლოს-ანჯელესის პოლიცია იძიებს.

ვაინშტაინის ადგილზე მისვლა რამდენიმე ქალმა და ახალგაზრდა კომიკოსმა, კელი ბეჩმენმა სცენაზე ასვლისთანავე გააპროტესტა.

"იცით, რომ ამ ოთახში სპილოა? იცით ის ვინაა?" — თქვა მან და დასძინა, რომ არ ელოდა ამ ღონისძიებაზე გაუპატიურებაზე თუ მოუწევდა საუბარი. ბეჩმენმა ვაინშტაინი საშინელებათა ფილმის გმირის, ფრედი კრიუგერის სახელითაც მოიხსენია. გამომსვლელის სიტყვებს აუდიტორია უკმაყოფილო ზუზუნით შეხვდა, ერთ-ერთმა დამსწრემ კი დაუძახა, რომ "მოეკეტა". კელი ერთადერთი გამომსვლელი იყო, რომელმაც გაუპატიურებაში ბრალდებული პროდიუსერის აუდიტორიაში ყოფნა სცენიდან აღნიშნა.

ამის შემდეგ, შოუს ერთ-ერთი დამსწრემ, ზოი სტაკლისმა ვაინშტაინის მიმართ სხვა დამსწრეების სიჩუმე გააპროტესტა და ისიც, რომ მას ასე მშვიდად შეხვდნენ, რის შემდეგაც ის ბარიდან გააძევს. ზოიმ ფეისბუქზე ვრცელი პოსტი გამოაქვეყნა, რომელშიც საღამოს შესახებ მოყვა და საზოგადოების პასიურობა გააკრიტიკა.

"მე გავალ და ბედნიერი ვარ, რომ ამ ადგილიდან გავალ, მაგრამ არავინ არაფერს ამბობს!" — ისმის ახალგაზრდა ქალის ხმამაღალი საუბარი ვიდეოში, იქამდე, სანამ მას ბარიდან გააძევებენ.

"ვფიქრობდი იმ ადამიანებზე, რომლებსაც წლების განმავლობაში აჩუმებდა. ვფიქრობდი ხელოვანებზე და ქალებზე, რომლებიც იმ შიშით იყვნენ პარალიზებულნი, რომელიც მე ვიგრძენი, შიშით, რომელიც მათ კოლეგებს სიჩუმისა და პასიურობის კულტურაში შიშის ქვეშ ამყოფებდა. ეს ოთახი ჩვენი საზოგადოების მიკროსამყარო იყო", — წერს ზოი ფეისბუქზე.

"ჩვენი პასიურობა მომწამვლელია. ერთად უნდა ვიდგეთ და უსამართლობა გავაპროტესტოთ. წინააღმდეგ შემთხვევაში, შიშით წახალისებული ეს საწამლავი ხრწნას გამოიწვევს", — ამ სიტყვებით ასრულებს ზოი პოსტს.

მესამე ქალი, რომელიც ვაინშტაინის ადგილზე ყოფნას უკმაყოფილებით შეხვდა, ამბერ როლოა — კომიკოსი კელი ბეჩმენის მეგობარი. ბარიდან ისიც გააძევეს.

"მივედი და ვუთხარი, რომ წყეული მონსტრი იყო, რომელიც უნდა გამქრალიყო. მისმა მეგობარმა თუ დაცვის წევრმა კი ბოზი მიწოდა. მინდოდა, მაგიდის მეორე მხარეს მივწვდომოდი და მიმეხრჩო", — წერს ამბერი ტვიტერზე. მან ზოის შესახებაც დატვიტა და აუდიტორიაში ყველაზე "ჯანსაღად მოაზროვნე" ადამიანი უწოდა.

ვაინშტაინმა და მისმა წარმომადგენელმა ინციდენტზე Variety-სთან ისაუბრეს:

"ჰარვი ვაინშტაინი მეგობრებთან ერთად იყო გარეთ, სიამოვნებას იღებდა მუსიკისგან და ცდილობდა მცირედი ნუგეში და სიმშვიდე ეგრძნო საკუთარ ცხოვრებაში, რომელიც თავდაყირა დადგა. შექმნილი სიტუაცია უხეში და არასასურველი იყო და ასევე იმის მაგალითი, თუ როგორ გამოაქვთ სასამართლო პროცესი საჯარო სივრცეში".

თავად ვაინშტაინმა კი წერილობით განაცხადა, რომ ნებისმიერის კითხვებს უპასუხებს, იმ უფლებებს კი, რომლებიც თავად აქვს, დაიცავს.

ორი წლის წინ, შემოდგომაზე, ჰოლივუდი დაუგეგმავმა ონლაინ კამპანიამ, #MeToo მოიცვა. წარმატებული მსახიობი ქალები ჰოლივუდის ერთ-ერთი ყველაზე გავლენიანი პროდიუსერის გარყვნილ ქმედებებზე ალაპარაკდნენ. 100-ზე მეტმა ქალმა ჰარვი ვაინშტაინი სექსუალურ შევიწროებაში, ძალადობასა და გაუპატიურებაში დაადანაშაულა. მის საქმეს ლონდონის, ნიუ-იორკისა და ლოს-ანჯელესის პოლიცია იძიებს. 2018 წლის 25 მაისს ვაინშტაინს ნიუ-იორკის პოლიციამ ბრალი წაუყენა, რომელიც ითვალისწინებდა ორ ქალთან "გაუპატიურების, ძალადობრივი სექსუალური აქტის, სექსუალური შევიწროების და უკანონო სექსუალური ქმედებების" დანაშაულს. ვაინშტაინი პოლიციას ჩაბარდა და დააპატიმრეს, თუმცა ის 1 მილიონი დოლარის გირაოს სანაცვლოდ მალევე გაათავისუფლეს.