ცნობილი ავსტრალიელი მუსიკოსი, ნიკ ქეივი ბოლო პერიოდში ინტერნეტში ფანების მიერ დასმულ კითხვებს ხშირად საჯაროდ და გულახდილად პასუხობს. მაგალითად, მას სხვადასხვა დროს უსაუბრია თავისი ვაჟის გარდაცვალებაზე თუ იმ თანამედროვე კულტურულ ცვლილებებზე, რომლებიც ქალებზე დიდ გავლენას ახდენს.

ამისათვის ის ხშირად იყენებს საიტ Red Hand Files-ს პლატფორმას, სადაც ცოტა ხნის წინ მუსიკოსს ახალგაზრდა იტალიელმა ფანმა, ბარბარამ დაუსვა საკმაოდ ემოციური კითხვა საკუთარი სხეულის მიმღებლობაზე:

"საკუთარი თავი საერთოდ არ მომწონს. ვერანაირ დადებითს ვერ ვხედავ ჩემს სხეულში და სარკეში საკუთარი თავის დანახვა მძულს, რის გამოც ძალიან ვიტანჯები. მგონია, რომ ყველა ჩემზე უკეთესია, არადა 16 წლის ასაკის გათვალისწინებით საკმაოდ მნიშვნელოვანი რაღაცებისთვის მიმიღწევია. როგორ უნდა მოვიქცე? რა მოვუხერხო ჩემს თავს?"

ნიკ ქეივმა ეს წერილი უყურადღებოდ არ დატოვა, მეტიც, მადლობა გადაუხადა ამ "გაბედული და გულწრფელი" კითხვისთვის.

"ამის შესახებ ჩემს არაერთ ქალ მეგობარს მოვუყევი და თითოეულ მათგანზე შენმა გულახდილობამ ძალიან იმოქმედა. მათ ისიც ზუსტად გაიგეს, თუ რა გაწუხებს შენ, რაც იმას ნიშნავს, რომ სარკეში საკუთარი ანარეკლის პირისპირ მარტო არ ხარ."

ამის შემდეგ მომღერალმა საკუთარ გამოცდილებაზე ისაუბრა:

"ამ კითხვამ საკუთარ სიყმაწვილეში დამაბრუნა, როცა ჩემი გარეგნობა სულაც არ მომწონდა. ამის გამო ულმობელი სარკის წინ მდგარმა თინეიჯერობა კოშმარულად გავატარე. ვშიშობ, უნდა გითხრა, რომ ეს მუდმივი თვითკრიტიკულობა ასაკთან ერთად არ გაქრება, უბრალოდ შემდეგში უფრო მეტად შეგეძლება მისი მართვა. ეს დღეებია ძირითადად სასტუმროებში ვცხოვრობ და როცა ყოველ ღამით სხვადასხვა აბაზანაში შევდივარ, სადაც უზარმაზარი მართკუთხა სარკე და უმოწყალო, კაშკაშა განათებაა, ვდგები სარკის წინ და ჩემს ყოვლად უმწეო და დაუცველ თავს შევცქერი."

ნიკ ქეივი, რომელიც გასულ წლებში ღიად და საჯაროდ საუბრობდა შვილის გარდაცვალებისგან მიღებულ ტრავმაზე, 16 წლის ბარბარასაც ურჩევს, რომ ჩვენი მოწყვლადობა "არ უნდა იქნეს აღქმული, როგორც სისუსტე ან სირცხვილი. ჩვენ უნდა ვცადოთ საკუთარი თავების გაძლიერება სასტიკი, დაუნდობელი და გამკიცხავი სამყაროს წინააღმდეგ".

"ბარბარა, ძალიან მიხარია, რომ 16 წლის ასაკში უკვე მოახერხე მნიშვნელოვანი რაღაცების გაკეთება, რადგან ხშირად სწორედ ეს გვეხმარება, რომ ყურადღება იმაზე ფიქრის ნაცვლად, თუ როგორ გამოვიყურებით, სხვა რამეზე გადავიტანოთ. სიამაყის მარცვლები, რომლებიც შენს სიტყვებში ჩანს, არის ის, რაც საკუთარ თავში უკეთესობის აღმოჩენაში დაგეხმარება. შენი ტკივილით სავსე კითხვა თავის თავშივე ამავდროულად დიდი იმედის მატარებელია".

"პარადოქსულია, მაგრამ ამ საოცარი მგრძნობელობითა და დაუცველობით სავსე შენი კითხვა სწორედ უსაზღვრო სიძლიერის მაჩვენებელია, რაც შენს პიროვნებაზე კარგად მეტყველებს. რაღაც ძალიან მშვენიერი ბრწყინავს ამ ერთი შეხედვით უბედურ სიტყვებს შორის. შენს სხეულში, რომელშიც "რაიმე დადებითს ვერ ხედავ", უჩვეულოდ მამაცი, პატიოსანი და გამჭრიახი გულია".

ეს საოცრად ემოციური წერილი 62 წლის მომღერალმა ამ სიტყვებით დაასრულა: "თავს გაუფრთხილდი, ეძებე უფრო მეტი მშვენიერება, ინსპირაცია, ურთიერთობები და სანდო მეგობრები".