მსოფლიოს უძველესი მუსიკალური მაღაზია Spillers Records ინგლისელი მუსიკოსის, მორისის ალბომების გაყიდვაზე უარს ამბობს. მიზეზი The Smiths-ის ყოფილი სოლისტის მხრიდან ბრიტანეთის ულტრამემარჯვენე პარტიის ღია მხარდაჭერაა.

ცოტა ხნის წინ, მორისიმ ჯიმი ფელონის შოუში ახალი ალბომიდან California Son სიმღერა Morning Starship შეასრულა. მას პარტიის მხარდამჭერი ლოგო ეკეთა.

"შეშფოთებული ვარ, მაგრამ არა — გაკვირვებული. ვნანობ, რომ ასე უფრო ადრე არ მოვიქეცი", — ამბობს Spillers-ის მფლობელი.

ალბომში, რომელიც ხვალ, 24 მაისს, გამოდის, შედის ჯონი მიტჩელის, როი ორბისონისა და ბობ დილანის სიმღერების ქავერები.

პარტიის For Britain ლიდერი, ენი მარი ვოთერსი ისლამს "ეშმაკს" უწოდებს და მოიხსენიებს კულტურად, რომელიც "თანამედროვე საზოგადოებაში ვერ ჯდება". ცოტა ხნის წინ, მან მორისის მადლობა გადაუხადა პარტიის მხარდაჭერისთვის.

The Smiths-ის ყოფილი ფრონტმენი ბოლო წლებში კონტროვერსული ფიგურა გახდა. 2007 წელს მან NME-სთან ინტერვიუში თქვა, რომ სხვა ეროვნების ადამიანები "ბრიტანულ იდენტობას" აქრობენ. 2010 წელს მან ჩინელებს "ქვესახეობები" უწოდა. ისლამის მხრიდან ხორცის შეზღუდვაზე კი თქვა, რომ ეს "ბოროტება იყო".