ინსტაგრამი ცდილობს გამოიძიოს, თუ როგორ მოხვდა ინსტაგრამის 50 მილიონი მომხმარებლის საკონტაქტო ინფორმაცია ინტერნეტში ყველასათვის ხელმისაწვდომ მონაცემთა ბაზაში.

TechCrunch-ის თქმით, ინსტაგრამ-ინფლუენსერების ანგარიშების შემცველი მონაცემთა ბაზა მათ იმეილებსა და საკონტაქტო ნომრებსაც შეიცავდა.

როგორც ირკვევა, მონაცემთა ბაზა მუმბაიში დაფუძნებულ კომპანია Chtrbox-თანაა კავშირში. ინსტაგრამმა BBC-ს განუცხადა, რომ ისინი ამჟამად ცდილობენ გაარკვიონ, თუ როგორ აღმოჩნდა ეს ინფორმაცია მონაცემთა ბაზაში.

"ჩვენ ვსწავლობთ ამ შემთხვევას, რათა გაირკვეს, არსებული ინფორმაციის წყარო ინსტაგრამია, თუ რაიმე სხვა პლატფორმა. ჩვენ ასევე დავუკავშირდით Chtrbox-ს, რათა სიტუაციას უკეთ გავეცნოთ", — ნათქვამია ინსტაგრამის მიერ გავრცელებულ განცხადებაში.

TechCrunch-ის თქმით, ბაზა ასევე შეიცავდა ინფორმაციას მომხმარებლების ადგილმდებარეობის შესახებ. მონაცემა ბაზა Amazon-ის სერვერზე იყო შენახული, თუმცა ის პაროლით დაცული არ იყო.

ბაზის შესახებ TechCrunch-ის ინდოელმა მეცნიერმა აცნობა.

Chtrbox მარკეტინგის სფეროშ მომუშავე კომპანიაა, მათ აღნიშნულ საკითხთან დაკავშირებით კომენტარი არ გაუკეთებიათ, თუმცა ბაზა ამჟამად ხელმისაწვდომი აღარ არის.

აღსანიშნავია, რომ ინსტაგრამის ანგარიშებიდან ინფორმაციის შეგროვება პლატფორმის წესებს ეწინააღმდეგება.