ჟურნალ American Osteopathic Association-ში გამოქვეყნებული უახლესი ამერიკული კვლევის მიხედვით, მარიხუანის აქტიურ მომხმარებლებს ოპერაციის დროს ანესთეზიის ორჯერ მეტი დოზა სჭირდებათ.

მარიხუანა სამედიცინო და პირადი მოხმარების მიზნით ამერიკის უფრო და უფრო მეტ შტატში ხდება კანონიერი. მკვლევარებმა შეისწავლეს 250 პაციენტი კოლორადოდან, რომლებსაც მარტივი ოპერაციების დროს ანესთეზიის გაკეთება დასჭირდათ. რეკრეაციული მიზნით მარიხუანის მოხმარება კოლორადოში ლეგალურია.

პაციენტების 10%-მა განაცხადა, რომ ისინი მარიხუანას რეგულარულად მოიხმარენ. კვლევის შედეგების მიხედვით, სხვა პაციენტებთან შედარებით, მათ ანესთეზიის ორჯერ მეტი რაოდენობა სჭირდებოდათ. კონკრეტულად, — პროპოფოლი. ასევე 14%-ით მეტი ტკივილგამაყუჩებელი ფენტანილი და 20%-ით მეტი დამაძინებელი დორმიკუმი [მიდაზოლამი].

"მარიხუანის მომხმარებლები ვერ იტყვიან, რომ მათი გამოყენება სამედიცინო დონეზე გავლენას არ ახდენს. ის ფაქტი, რომ მათი მოხმარება ამ სამი მედიკამენტის ეფექტიანობას ამცირებს, ბადებს ეჭვებს, რომ ის სხვა პრეპარატებზეც იმოქმედებს. მაგალითად, შფოთვის შემამცირებელ წამლებსა და რიგით ტკივილგამაყუჩებლებზე. იმის გამო, რომ მარიხუანა სხეულში დიდი ხნით რჩება, ამ გავლენის შემცირებას თვეები შესაძლოა დასჭირდეს. პროცედურის წინ, ყველა პაციენტმა უნდა შეატყობინოს ექიმს მარიხუანის მოხმარების შესახებ", - ამბობს კვლევის ავტორი ექიმი მარკ ტვარდოვსკი.

კვლევაში მონაწილე პაციენტების უმრავლესობა კოლონოსკოპიას გადიოდა.

ავტორი დასძენს, რომ კვლევის შედეგები წინასწარია და მის დადასტურებას მარიხუანის უფრო დიდი რაოდენობის მომხმარებლის შესწავლა სჭირდება. თუმცა, ეს შედეგები საკმარისია იმისთვის, რომ ექიმმა პაციენტის მკურნალობის დაწყებამდე მარიხუანის მოხმარების ფაქტორი გაითვალისწინოს.