არ ვიცი რატომ, მაგრამ ბოლო დროს, როცა მეკითხებიან რამდენი წლის ხარო, 24 წლის-მეთქი, ვპასუხობ, მაგრამ რაც მართალია, მართალია — სინამდვილეში, 25-ის ვარ.

როცა 25-ის ხარ, ხვდები, რომ სხვა ასაკობრივ კატეგორიაში გადაინაცვლე. ხვდები, რომ ბავშვებისთვის ბიძია, თინეიჯერებისთვის ზრდასრული, აი, შენზე უფროსებისთვის კი ჯერ კიდევ გამოუცდელი ადამიანი შეიძლება იყო.

ობიექტური რეალობა კი ის არის, რომ საკმაოდ დიდი ხარ საიმისოდ, მინიმუმ რამდენი წლისაც ხარ, მაგდენივე გაკვეთილი გქონდეს ნასწავლი ცხოვრებისგან.

მოკლედ, აი, ის 25 რამ, რაც 25 წლის ასაკამდე ვისწავლე. ვინ იცის, იქნებ თქვენც გამოგადგეთ:

1. ქინძისა და ოხრახუშის ერთმანეთისგან გარჩევა

მართალია, კულინარიაში გამოცდილ ადამიანებს ეს დილემა სიცილადაც არ ეყოფათ, მაგრამ სხვებისათვის ქინძისა და ოხრახუშის გარჩევა სულაც არაა ხელწამოსაკრავი საკითხი. გირჩევთ, მწვანილის ყიდვას ქინძით დაიწყოთ, რომელსაც უფრო წვრილი ღერო, სუსტი ფოთლები და 99% შემთხვევაში ფესვები აქვს. შესაბამისად, მეორე მწვანილი, რომელიც დახლზე დევს და ქინძს წააგავს, ოხრახუშია.

თუ არადა, დაფასოებულ მწვანილზე კონცენტრირდით.

2. ლამინატის დაგება

ლამინატის დაგება იმიტომ ვისწავლე, რომ სახლში იატაკის განახლება მინდოდა. მასალის შერჩევაში, დაჭრასა და აწყობაში თავიდან დახმარება დამჭირდა, 20-30 წუთის შემდეგ კი დაგება საკუთარი ხელითაც გამომივიდა და ასე შევცვალე სახლის იატაკი საკუთარი ხელით. აი, უკვე თამამად შემიძლია გირჩიოთ, რომ არასდროს დაზოგოთ ფული ლამინატის შეძენისას, სჯობს ხარისხიანი და გამძლე იყოს, განახლებული იატაკის მთავარი მტერი კი მასზე დაღვრილი ნებსმიერი სითხეა.

3. ერთნაირად ხელის მოწერა

შეიძლება გაგიკვირდეთ კიდეც, ხელის მოწერას რა სწავლა უნდაო, თუმცა, სინამდვილეში საკმაოდ მნიშვნელოვანია, რომ ყოველთვის ერთნაირად აწერდეთ ხელს. ასე ხომ თქვენი ხელმოწერის გაყალბება თითქმის შეუძლებელი იქნება.

4. ფულის გვერდზე გადადება

კი, ფულის დაზოგვასაც სჭირდება სწავლა. ხელფასის სწორად გადანაწილება ხომ ნახევარი საქმეა ცხოვრებაში?! ძნელი არ არის, უბრალოდ წინასწარ უნდა გაითვალისწინოთ, რომ ზაფხულში დასასვენებლად, სასურველი ტექნიკის შესაძენად, ან გაუთვალისწინებელი შემთხვევებისთვის, აუცილებლად დაგჭირდებათ თანხა, რომელიც შეგიძლიათ წიგნში გადამალოთ, კონვერტით შეინახოთ, ან უბრალოდ ბანკში გახსნათ ანაბარი.

5. ბოდიშის მოხდა

მართალია, შეცდომებს ყველა უშვებს, მაგრამ ამ შეცდომებზე სწავლა ცოტას თუ გამოსდის.

პირველ რიგში, საკუთარ თავს თავადვე აპატიეთ და პირობა მიეცით, რომ ეცდებით, ასე არასდროს მოიქცეთ. გულწრფელი წუხილითა და აღიარებით კი თქვენივე საქციელით განაწყენებული ადამიანიც კმაყოფილი იქნება და მერე უკვე — თქვენც.

6. ჩურჩხელების ამოვლება

ჩურჩხელა არაა მითიური საჭმელი, რომლის დამზადება და თქვენთვის გადმოცემა მხოლოდ ბებიებს შეუძლიათ. თუ მეტი ჩურჩხელა გინდათ ცხოვრებაში, ამ მიზნის მიღწევა მარტივია.

პირველ რიგში ყურძნის წვენი, ანუ კარგი ბადაგია საჭირო, რომელსაც შაქრიან ფქვილში გაურევთ და დაბალ ცეცხლზე წამოადუღებთ. კარგად მორევაც არ უნდა დაგავიწყდეთ. ფინალური ეტაპი ყველაზე სახალისოა, როცა ძაფზე ასხმულ ნიგოზსა, თუ თხილს უკვე კარგად შესქელებულ, მზა თათარაში ამოავლებთ მინიმუმ ორჯერ. გამოშრობას საკმაოდ დიდი დრო კი სჭირდება, მაგრამ შედეგით ნამდვილად კმაყოფილი დარჩებით.

7. ტანსაცმლის გაუთოების რამდენიმე მეთოდი

ტანსაცმლის გაუთოვება არავის უყვარს, მაგრამ კარგი იქნება, თუ საკუთარ მაისურებს, პერანგებსა, თუ შარვლებს სხვას არ გადააბარებთ.

სინამდვილეში ძალიან მარტივია. ისიც საკმარისია, იცოდეთ, საერთოდ რისი გაუთოვება შეიძლება და რისი — არა. რა თქმა უნდა, ჩართული უთო საყვარელ პერანგზე არ უნდა დაგრჩეთ დადებული. ჰო, და ვისაც უთო არ გაქვთ, დაჭმუჭნული ტანსაცმლის გასაუთოვებლად სხვა წვრილი ტექნიკა გამოგადგებათ. ოდნავ დანამეთ ტანსაცმელი და მერე ფენი მიუშვირეთ.

8. საკუთარი თავის პატივისცემა

რთული არაფერია, მთავარია კარგად დაფიქრდეთ და გაიგოთ თქვენი ნამდვილი სურვილების, მიზნებისა და რაც მთავარია, შესაძლებლობების შესახებ. ეს ყველაფერი ხომ მიმზიდველი სკივრის ქექვას ჰგავს, რომლის ფსკერიც არ ჩანს და რომელშიც იცი, რომ თუ დაუღალავად გააგრძელებ ხელების ფათურს, აუცილებლად იპოვი საინტერესო ნივთებს.

9. წნევის გაზომვა

სინამდვილეში წნევის გაზომვა ძალიან მარტივია, რადგან მექანიკურის ნაცვლად, ახლა უკვე ჭკვიანი აპარატები იყიდება, რომელსაც მკლავზე გაიკეთებთ, დააჭერთ ღილაკს და სულ ეს არის.

აქვე იმასაც გეტყვით, რომ ნორმალური წნევა ინდივიდუალურად დგინდება, მაგალითად, 30 წლამდე ასაკის კაცისთვის 126/79-ზე, ხოლო ამავე ასაკის ქალისთვის 120/75-ზეა ნორმალური წნევა.

10. საკუთარი ძალებით კედლების შეღებვა

კარგად დაგრუნტულ და გასწორებულ კედლებზე საღებავის გადასმა არაპროფესიონალებსაც შეუძლიათ.

პირველ რიგში საჭირო ნივთები უნდა იყიდოთ — გრუნტი, საღებავი, საფხეკი დანა, როლერი, პატარა ფუნჯი კუთხეების შესაღებად და სამშენებლო პლასტირი. გასუფთავებულ კედლებს ჯერ გრუნტით ამუშავებთ, კარგად გაშრობის შემდეგ კი სასურველ ფერში ღებავთ.

11. თმის შეჭრა

წინასწარ გაფრთხილებთ, რომ გამოცდილი სტილისტივით 15 წუთში სასურველ ვარცხნილობას ვერ მიიღებთ. აუჩქარებლად დაიმოკლეთ თმა და სცადეთ, რომ მეტნაკლებად პროპორციებიც დაიცვათ. სასურველია, თმა მჭრელი მაკრატლით შეიჭრათ და არ დაგავიწყდეთ, რომ სავარცხელიც დაგჭირდებათ.

12. ცხოველებზე ზრუნვა

ცხოველები თუ გიყვართ, ეს არ ნიშნავს, რომ ცხოველებზე ზრუნვა იცით. მაგალითად, სახლში თუ ძაღლი, კატა და თევზები გყავთ, უნდა იცოდეთ, რომ თითოეულ მათგანს დრო, საკუთარი სივრცე და ნივთები სჭირდება.

მათი დაბანა მხოლოდ სპეციალურად მათთვის განკუთვნილი შამპუნით შეიძლება. თავისებური ენაც აქვთ, რომლითაც მიგანიშნებენ, როდის შიათ, ან წყურიათ. თუ თევზები გყავთ, გაითვალისწინეთ, რომ ბევრი არ უნდა აჭამოთ, წყალი კი ხშირად უნდა გამოცვალოთ, კვირაში ორჯერ მთლიანი აკვარიუმის გაწმენდაც აუცილებელია.

13. ტანსაცმლის გადაკეთება

როდესაც თბილი სეზონი მოდის და ფული არ გაქვთ, რომ მაშინვე წახვიდეთ და ახალი შორტები იყიდოთ, ან უბრალოდ გეზარებათ საყიდლებზე სიარული, ტანსაცმლის გადაკეთება საუკეთესო გამოსავალია.

მაკრატლისა და სახაზავის დახმარებით არაჩვეულებრივად გამოგივათ გრძელტოტებიანი ჯინსის მოდურ ბრიჯად გადაკეთება, გრძელტოტებიანი მაისურისთვის მკლავების დამოკლება ან ყელის ამოჭრა. ამისთვის უამრავი ტუტორიალი არსებობს.

14. ნალექიანი ყავის მოდუღება

კარგი ნალექიანი ყავა ასე მზადდება: ჩაყარეთ მადუღარაში ერთი ჩაის კოვზი ყავა და ერთი კოვზი შაქარი და თავიდანვე კარგად მოურიეთ. დაბალ ცეცლხე როცა შემოდგამთ კი ყურადღება მიაქციეთ, უცებ იცის აქაფება და გადმოსვლა. როგორც კი ბევრ ბუშტუკებს დაინახავთ, გამორთეთ.

აღსანიშნავია, რომ დასხმასაც ცოდნა სჭირდება — ზედაპირზე დაგროვილი ქაფი კოვზით უნდა გადაიტანოთ ჭიქაში, დარჩენილი მასა კი ზემოდან მოასხათ აუჩქარებლად და უგემრიელესი ნალექიანი ყავაც, მზად არის.

15. ხინკლის გაკეთება

წვნიანი და ბლომად ნაოჭიანი ხინკალიც მარტივი მოსამზადებელია — სანამ მარილიან წყალში მაგრად მოზელილი ცომი ისვენებს, შერეულ ფარშს ხახვში, შავ პილპილსა და მარილში მოურევთ. შემდეგ კი კარგად გაბრტყელებული ცომიდან ამოჭრილ რგოლებში თითო კოვზ ფარშს ჩადებთ და მოხვევისას, მაქსიმალურად ბევრ ნაოჭს გაუკეთებთ. ეს უკვე ტექნიკის ამბავია.

თქვენივე ხელით გამზადებული ხინკალი ადუღებულ წყალში ჩაყარეთ და 7-8 წუთის შემდეგ ჭამეთ. ჰო, და ინსტაგრამზე ფოტოს დადებაც არ დაგავიწყდეთ.

16. კარგი პაროლების მოფიქრება

თუ ჯერ არ წაგიკითხავთ სტატია "10 სულელური პაროლი, რომელიც არასდროს უნდა გამოიყენოთ", დიდი შანსია, რომ თქვენი პაროლი თქვენივე დაბადების წელი იყოს.

არადა, უსაფრთხო პაროლის მოფიქრება საკმაოდ მარტივია და არც მათი დამახსოვრებაა დიდად რთული.

17. პირადი ნომერი

ვერ წარმოდიგენთ, რამხელა კომფორტია, როცა ბანკის კონსულტანტი პირად ნომერს გთხოვთ და ჯიბიდან პირადობის მოწმობის ამოღების გარეშე ეუბნებით.

ასევე კარგი იქნება, თუ პაროლები, ბარათების კოდები, თუ ოჯახის წევრების ტელეფონის ნომრები თქვენც ზეპირად გემახსოვრებათ. არგუმენტი, რომ ყველაფერს ტელეფონში ინიშნავთ, მაშინვე გაბათილდება, როცა ტელეფონი უდროო დროს დაჯდება, თქვენ კი საჭირო ინფორმაციის გარეშე დარჩებით.

18. უკეთ წერა

თანამედროვე სამყაროში ადამიანებთან ურთიერთობა ძირითადად მიმოწერით გვიწევს და ვფიქრობ, სათქმელის უფრო გასაგებად და ჩამოყალიბებულად გადმოცემა თითოეულ ჩვენგანს უნდა შეეძლოს.

შეცდომების მინიმუმამდე დასაყვანად კი ონლაინ რესურსებიც არსებობს, გრამატიკის წიგნებიც და სხვების მაგალითებიც.

19. ნარდის თამაში ისე, რომ მოწინააღმდეგეს მარსი მოვუგო

"ბრძნული" რჩევები: დუშაშს ზოგჯერ სჯობს იაგნები გააგოროთ, თუ არ გაწყობთ, არ უნდა მოკლათ და მარტივად გამოსასვლელად იაქეზე ქვები უნდა დააგროვოთ.

20. ექიმთან დროულად მისვლა

შეიძლება საავადმყოფოში მისვლა არ გსიამოვნებთ და შესაბამისად არც ექიმების დანახვა, მაგრამ ჯანმრთელობის ნებისმიერი პრობლემის გაჩენისას ექიმთან დროული ვიზიტი მდგომარეობის გართულებას, დამატებით ნერვიულობასა და გაუთვალისწინებელ ხარჯებს თავიდან აგარიდებთ.

21. მხოლოდ კონკრეტული ადამიანების აზრების გათვალისწინება

როცა ვიღაცას თქვენი თმის ფერი არ მოსწონს, ამაზე ნერვიულობა ნამდვილად არ ღირს, მაგრამ როდესაც ვინმე ახლობელი გეუბნებათ, რომ თქვენზე ღელავს - მისთვის მოსმენა ცუდი იდეა არ იქნება.

22. ენაზე კბილის დაჭერა

ხომ გაგიგიათ, რომ დუმილი ოქროა, მეტყველება კი - ვერცხლი? სხვათა შორის, ფინელებიც ასე ფიქრობენ.

როცა სათქმელი არაფერია, სჯობს, ენას კბილი დავაჭიროთ. ასე ხომ გაცილებით მარტივია ცხოვრება.

23. ჯანსაღი კვება

"ცომს არ ვჭამ და ცოტა ზეთი ვუქენი" ჯანსაღად კვებას სულაც არ ნიშნავს, მით უმეტეს, რომ მაღაზიისა, თუ ბაზრის დახლებზე ჯანსაღი პროდუქტების ფართო არჩევანია. ყოველდღიური რაციონი მაქსიმალურად ჯანსაღი პროდუქტებისგან უნდა შედგებოდეს. ამაზე თქვენი ენერგია, განწყობა, წონა, მხნეობა და ჯანმრთელობაა დამოკიდებული.

ყოველთვის ეცადეთ, რომ სეზონური ხილითა და ბოსტნეულით იკვებოთ. ჭამეთ ახალი კარტოფილი, მარწყვი და ახალი ტყემალი, რომელიც ძალიან მალე შემოვა. სასარგებლოა ბროკოლი, კომბოსტო, სტაფილო და ჭარხალიც. თევზი, ახალი ხორცი და სხვადასხვა მარცვლეული.

24. გარღვეული ტანსაცმლის გაკერვა, რაც, პრინციპში, ყველამ უნდა იცოდეს

მოძველებული, ან გარღვეული ტანსაცმლის გადაგდება მარტივია. თუმცა, გაცილებით მარტივია მისი გაკერვა და მისთვის ახალი სიცოცხლის შთაბერვა. სასიამოვნოც კია, როდესაც ამას საკუთარი ხელით აკეთებთ და საყვარელი მაისურის გადაგდება იმიტომ არ გიწევთ, რომ იღლიასთან გაირღვა.

თუ არავინაა, ვინც კერვას გასწავლით, არა უშავს. ინტერნეტში უამრავი ვიდეოგაკვეთილი არსებობს.

25. გაკონტრრევოლუციონერებულებისნაირებისთვისაც — ამ სიტყვის სწრაფად წარმოთქმა

სიმართლე გითხრათ, ეს ცოდნა დიდად არ მადგება, მაგრამ ამ სიტყვის თქმას თუ შეძლებთ, მერე აღარასდროს დაგავიწყდებათ და ათასში ერთხელ ვინმე უცნობზეც მოახდენთ შთაბეჭდილებას.