ოთხშაბათს მომხდარი ავარიის შედეგად ატლანტაში გზატკეცილზე დაახლოებით 18 143 ლიტრი შავი მელანი დაიღვარა, ხოლო თუ პრინტერისათვის ახალი კარტრიჯის შეძენა ერთხელ მაინც გიცდიათ, გეცოდინებათ, რომ საქმე ძალიან, ძალიან ძვირადღირებულ ავარიასთან გვაქვს.

ატლანტაში არსებული ადგილობრივი საინფორმაციო სააგენტოს მიერ გავრცელებული ინფორმაციით, ავტოშემთხვევა დაახლოებით ღამის ორ საათზე მოხდა. 18 143-მა კილოგრამმა შავმა მელანმა კი მთელი გზატკეცილი მოთხვარა, რამაც გზაზე დიდი შეფერხება გამოიწვია.

საბოლოოდ გზატეკცილზე მოძრაობა აღდგა, თუმცა მასზე მელნის მიერ დატოვებული დიდი ლაქა კვლავ შესამჩნევია. საბედნიეროდ, ავტოავარიას მსხვერპლი არ მოჰყოლია.

პრინტერის შავ მელანს მსოფლიოში ერთ-ერთ ყველაზე ძვირადღირებულ სითხედ ხშირად მოიხსენიებენ ხოლმე. Consumer Report-ზე დაყრდნობით, ყველაზე იაფ კარტრიჯებში ერთი მილილიტრი მელანი დაახლოებით 50 ცენტი ღირს, ყველაზე ძვირადღირებულებში კი ერთი მილილიტრი შავი მელნის ფასი 3,2 დოლარს აღწევს. ეს ნიშნავს, რომ პრინტერის ყველაზე იაფიანი, ერთი ლიტრი მელნის ფასი $439-დან იწყება, ყველაზე ძვირადღირებულის შემთხვევაში კი ერთი ლიტრის ფასი დაახლოებით სამი ათას დოლარს აღწევს. საშუალოდ, პრინტერის ერთი ლიტრი შავი მელნის ფასი დაახლოებით $730-ია. ამ მონაცემებს თუ გავითვალისწინებთ, ავარიით გამოწვეული ზარალის რაოდენობა დაახლოებით $13 243 660 გამოდის, რაც გზატკეცილზე დასაღვრელად წარმოუდგენლად დიდი თანხაა.

შეგვიძლია საკითხს ცოტა ოპტიმისტურად შევხედოთ და ჩავთვალოთ, რომ სატვირთო მანქანას ყველაზე იაფიანი მელანი გადაჰქონდა, ამ შემთხვევაში ზარალი დაახლოებით რვა მილიონი დოლარია, რაც დიდი შეღავათი ვერ არის.

რომელ კომპანიას ეკუთვნოდა აღნიშნული მელანი უცნობია, თუმცა ფაქტია, რომ ერთ-ერთი მათგანის ისტორიაში 2019 წლის 20 მარტი დიდ შავ ლაქად დარჩება.