მაშინ, როცა ფეისბუქი ერთი წლის შექმნილი იყო და მსოფლიო სულ სხვანაირი იყო, ლედი გაგას გარშემომყოფები ნამდვილი სახელითა და გვარით იცნობდნენ.

სტეფანი ჯერმანოტა თავისი თინეიჯერობის წლებში პოპულარული არ იყო, თუმცა მის მცდელობას, ეპოვა წარმატება და გამხდარიყო ცნობილი, თანატოლები ირონიით ხვდებოდნენ.

სტუდენტობისას, გაგას ჯგუფელებმა ფეისბუქზე ჯგუფი შექმნეს, სახელად "სტეფანი ჯერმანოტა, ვერასდროს გახდები ცნობილი".

ჯგუფში სულ 12 წევრი იყო. ამ დროისთვის, ის ფეისბუქმა ან თავად ავტორებმა გააუქმეს.

ჯგუფის სქრინები ტვიტერზე გაგას ფანებმა გაავრცელეს:

"არასდროს მოუსმინოთ მათ, ვინც ვერ გიტანთ. გჯეროდეთ საკუთარი თავის".

გაგამ ნიუ-იორკის უნივერსიტეტში სწავლა მიატოვა, რათა მუსიკალურ კარიერას გაჰყოლოდა და ახლა ჩვენი დროის ერთ-ერთი ყველაზე ცნობილი ხელოვანია.

"როცა ახალგაზრდა ვიყავი და ფეისბუქი ერთი წლის იყო, ადამიანები სხვების დასაცინად ჯგუფებს აკეთებდნენ. მახსოვს, როცა გაგაზე შექმნილ ჯგუფს გადავაწყდი, ამან გული გამიტეხა.

ჯგუფი 18 წლის გაგას სურათებით იყო სავსე. ის სტუდენტი იყო, რომელიც ადგილობრივ ბარებში უკრავდა და მღეროდა. მის პოსტებზე იყო წარწერები, როგორიცაა "Attention Whore" [პროვოკატორი, რომელიც ყურადღებისთვის ყველაფერზე მიდის], "ნიჭიერია? არა"; "თავი ვინ ჰგონია?" ჯგუფში იყო მისი ბარში გამოსვლის პოსტერიც, რომელზეც ნაფეხურები ეტყობოდა", - წერს ჟურნალისტი ლორენ ბონი 2016 წლის ფეისბუქ პოსტში, რომელიც იმ დროს გაგას კურსელი იყო.

როგორც ის იხსენებს, 5 წლის შემდეგ ნიუ-იორკის მატარებელში იჯდა და New York Magazine-ში სტატიას კითხულობდა, ლედი გაგას პროფილზე.

"ტექსტში ავტორის აღნიშვნა იყო, რომ ლედი გაგას სასცენო სახელის უკან მისი ნამდვილი რეალური სახელი და გვარი იმალებოდა, რომელიც სტეფანი ჯერმანოტა იყო.

ღმერთო ჩემო, ვყვიროდი, ნუთუ ლედი გაგა სტეფანი ჯერმანოტაა? სტეფანი ლედი გაგაა?" - იხსენებს ის.

"მადლობა სტეფანი, რომ ყოველთვის გჯეროდა იმის, რომ სუპერვარსკვლავი იყავი, რომ გამოიყენე შენი ნიჭი და სიკაშკაშე სამყაროს უფრო გასაბრწყინებლად", - დასძენს ლორენი.

ფოტო: PA Images

ლედი გაგას ბულინგი თანატოლებისგან სკოლის ასაკშიც არ აკლდა. 2011 წელს გაგამ თავის წარსულზე ისაუბრა და ეს გამოცდილება 2012 წელს პაულა იოჰანსონის ავტორობით გამოცემულ ბიოგრაფიაშიც მოხვდა:

"პიცერიაში ვიყავი მეგობრებთან ერთად, როცა იქ ჩემი სკოლელი გოგოები და ბიჭებიც მოვიდნენ. იმ ბიჭებს მეც ვიცნობდი. მათ ხელში ამიყვანეს და სანაგვე ყუთში ჩამაგდეს. ყუთი ჩემი უბნის სიახლოვეს იდგა. გოგოები პიცერიიდან გამოდიოდნენ, როცა დამინახეს და ჩემზე სიცილი დაიწყეს. ერთ მომენტში მეც კი დავიწყე სიცილი, რადგან მერჩივნა გამეცინა, ვიდრე მათ ჩემი ცრემლები ენახათ. თუმცა ეს ნერვული სიცილი იყო. ერთ-ერთმა გოგომ მკითხა? "რა, ახლა ტირილს აპირებ? რა ყალბი ხარ".

გაგას მონაყოლს MTV-სთვის გადაღებული ვიდეო ერთვის, რომელშიც ის სექსუალური შევიწროების წინააღმდეგ მიმართულ კამპანიაში მონაწილეობს. ფანების შექმნილი ვიდეო ტვიტერზე ერთ-ერთმა გულშემატკივარმა გამოაქვეყნა.

2019 წელს ლედი გაგა მსოფლიო ისტორიაში პირველი ქალი გახდა, რომელმაც ერთ წელს მოიგო გრემიც, ოსკარიც, ოქროს გლობუსიც და ბაფტაც. Celebrity Net Worth-ის ინფორმაციით, მისი შემოსავალი 300 მილიონი დოლარია. Forbes-ის მიხედვით, გაგამ მხოლოდ 2018 წლის დასაწყისში 50 მილიონი დოლარი გამოიმუშავა.