სამშაბათს აშშ-ს კოსმოსურმა სააგენტომ InSight-ის პირველი სელფი გამოაქვეყნა, რომელიც 11 სურათის შეერთებით არის მიღებული.

ფოტოში ვხედავთ რობოტის მზის ელემენტებს, ამინდის სენსორსა და სხვა სამეცნიერო ინსტრუმენტებს.

რობოტის პირველი სელფი მარსიდან

რობოტის პირველი სელფი მარსიდან

ფოტო: NASA/JPL-Caltech

InSight მარსზე 26 ნოემბერს შვიდთვიანი მოგზაურობის შემდეგ დაეშვა. მისია InSight, რომელიც ჯამში 830 მილიონი დოლარი დაჯდა, მარსზე ექვსი წლის წინ გაგზავნილი რობოტის, Curiosity-ს შემდეგ პირველი ხომალდია, რომელიც წითელ პლანეტაზე დაეშვა.

Curiosity-სგან განსხვავებით, ხომალდი InSight მარსის ზედაპირზე სტაციონარულად იქნება განთავსებული. მისი მიზანი მარსის გეოლოგიის შესწავლაა. ის სეისმომეტრითა და სპეციალური თერმომეტრით არის აღჭურვილი, რომელიც მიწის ქვეშ დაახლოებით 5 მეტრის სიღრმეზე განთავსდება.

რობოტი მარსის ეკვატორის ჩრდილოეთით არის განთავსებული. ამ რეგიონში მზის სხივები ყველა სეზონზე აღწევს, ეს კი რობოტის მზის ელემენტებს ენერგიით მუდმივად მოამარაგებს.