გოგონებს ხშირად ეუბნებიან, რომ სიმამაცე, გამბედაობა, შეუპოვრობა მამაკაცური თვისებებია, რეალურად კი, ისტორიას უამრავი მამაცი, გამბედავი და შეუპოვარი ქალი ახსოვს. განსხვავებით დისნეის პრინცესებისგან, ისინი გულხედაკრეფილნი არ ელოდნენ, როგორ გადაწყდებოდა მათი ბედი, ისინი იბრძოდნენ, ქმნიდნენ, ხმაურობდნენ და დასახულ მიზნებს აღწევდნენ.

ძილისპირული ამბები მეამბოხე გოგონებისთვის სწორედ ასეთი ქალების შესახებ მოგვითხრობს, დაწყებული კლეოპატრათი, დასრულებული სერენა უილიამსით. წიგნი გაფორმებულია 60 სხვადასხვა ქალი მხატვრის მიერ და თითოეული ამბავი ასე იწყება - "იყო და არა იყო რა, იყო ერთი გოგონა.."

წიგნის კონცეფციამ გამოსვლისთანავე აღფრთოვანება დაიმსახურა. ავტორებმა, ელენა ფავილმა და ფრანჩესკა კავალომ გამოსაცემად რეკორდული თანხა, მილიონი დოლარი შეაგროვეს. კამპანიის ყველაზე აქტიური მონაწილეები ახალგაზრდა მშობლები იყვნენ და სწორედ მათი დამსახურებაა, რომ ამ წიგნმა 2016 წელს დღის სინათლე იხილა. ძილისპირული ამბები მეამბოხე გოგონებისთვის სულ ცოტა 30 ენაზე ითარგმნა. ქართული თარგმანი კი სალომე ბენიძეს ეკუთვნის.

შეუძლებელია, პატარა გოგონები ამ საოცარი ისტორიებით არ მოიხიბლონ და არ დაფიქრდნენ იმაზე, რომ არაფერია მიუღწეველი: არც კოსმოსში გაფრენა, არც ქვეყნის მართვა, არც ახალი წამლის გამოგონება და არც ნობელის პრემიის აღება. მთავარია, ბავშვებმა თავიდანვე არ შეიზღუდონ თავი ოცნებებში.

გაიგეთ მეტი "შაბათის შუადღიდან", სადაც წიგნზე ნენე კვინიკაძე საუბრობს.