გერმანული რენესანსის წარმომადგენლის, ალბერტ დიურერის ეს გრავიურა მრავალი წლის მანძილზე დაკარგული იყო. ფლი მარკეტზე (წვრილმანების ბაზრობა) ის ფრანგმა არქეოლოგმა და კოლექციონერმა შემთხვევით აღმოაჩინა. ის ვერ იჯერებდა, რომ ხელში შედევრი ჩაუვარდა.

როდესაც კოლექციონერმა ნახატის უკან გერმანიის მუზეუმის ბეჭედი შენიშნა, გადაწყვიტა უკან ანონიმური შემოწირულობის სახით დაებრუნებინა.

დიურერი გერმანული რენესანსის ერთ-ერთი მნიშვნელოვანი ფიგურაა. გრავიურა, რომელზეც ღვთისმშობელს ანგელოზი გვირგვინს ადგამს, 1520 წლით თარიღდება და მეორე მსოფლიო ომის შემდეგ დაკარგულად მიიჩნეოდა.

ექსპერტების განცხადებით, ნამუშევარი ძალიან კარგ მდგომარეობაშია. აღმოჩნდა, რომ ის ქაღალდში გახვეული ინახებოდა და სწორედ ამიტომ არ დაზიანებულა.

შტუტგარტის მუზეუმში მის საჯარო ჩვენებას გეგმავენ.