ეგვიპტის ზოოპარკი უარყოფს, რომ ვირს შავი ზოლები დაახატა, იმისთვის, რომ ის ზებრასთვის მიემსგავსებინა. განხილვა მას შემდეგ დაიწყო, რაც საეჭვო მდგომარეობაში მყოფი ცხოველის ფოტო ფეისბუქზე გავირუსდა.

სტუდენტმა მაჰმუდ სარჰანმა კაიროში მდებარე ზოოპარკში სტუმრობის შემდეგ, სურათი გამოაქვეყნა, რომელშიც ცხოველი, რომელიც ზებრა უნდა იყოს, შეღებილ ვირს უფრო ჰგავს.

იმის გარდა, რომ "ზებრა" პატარა ზომის იყო და დიდი თვალები ჰქონდა, მის სახეზე შავი ზოლები გადღაბნილი იყო.

ფოტოს უკვე შვიდიათასზე მეტი შეარი აქვს. ექსპერტები სტუდენტის ვარაუდს ეთანხმებიან იმის თაობაზე, რომ ვოლიერში მყოფი ცხოველი ზებრა არაა. ადგილობრივი ვეტერინარის თქმით, ზებრას შავი ზოლები ბევრად უფრო პარალელურია.

სტუდენტი ამბობს, რომ ვოლიერში სულ ორი ცხოველი იყო და ორივე მათგანი, ზებრას ნაცვლად, შეღებილი ვირი იყო.

ზოოპარკის დირექტორი მუჰამედ სულთანი უარყოფს, რომ ცხოველები გაყალბებულნი არიან.

2009 წელს, პალესტინის ქალაქ ღაზაში ზოოპარკმა ბავშვების გასახალისებლად ვირები ზებრების მსგავსად შეღება.