შვედი დიჯეის ტიმ ბერგლინგის, იგივე Avicii-ს, სიკვდილის მიზეზი თვითმკვლელობა აღმოჩნდა. სტატიას ამ სახელწოდებით The Rolling Stones აქვეყნებს.

ბერგლინგის გარდაცვალებაზე მისმა ოჯახმა დღეს კიდევ ერთი განცხადება გაავრცელა:

"ტიმი მრავალ ეგზისტენციალურ კითხვაზე ეძებდა პასუხს. ის ბევრს ფიქრობდა ცხოვრების მნიშვნელობასა და ბედნიერებაზე. მას ასე გაგრძელება აღარ შეეძლო, სიმშვიდის პოვნა სურდა".

ოჯახის განცხადებით, როდესაც 2016 წელს მან ტურნეებზე უარი განაცხადა, მუსიკოსს ჯანმრთელობის პრობლემები ჰქონდა და "წონასწორობისა პოვნა სურდა". ოჯახმა განცხადება შვედურ ენაზე გაავრცელა:

"ის აგრძელებდა თავის საყვარელ საქმიანობას, მუსიკის წერას, თუმცა არ იყო შექმნილი იმ შოუ-ბიზნესისთვის და პოპულარობისთვის, რომელშიც აღმოჩნდა. ის მგრძნობიარე ბიჭი იყო, რომელსაც თავისი ფანები უყვარდა, მაგრამ ყურადღების ცენტრში ვეღარ ძლებდა".

შვედი DJ და მუსიკოსი Avicii, 28 წლის ასაკში, 20 აპრილს, გარდაიცვალა. ის ომანის დედაქალაქ მუსკატში იმყოფებოდა. როგორც პოლიცია აცხადებს, მუსიკოსი საეჭვო ვითარებაში არ დაღუპულა.