ამაზონის მიერ წარმოებული ალექსა, რომელიც უსასრულოდ ბევრ საქმეშია გამოსადეგი, მილიონობით ადამიანის ცხოვრების შეუცვლელი ნაწილი გახდა. აქამდე მასზე მხოლოდ კარგს ამბობდნენ, თუმცა რამდენიმე უიღბლო მომხმარებელის თქმით, ალექსა საშინელებათა ჟანრის ფილმის პერსონაჟს დაემსაგავა.

გასულ კვირას, ინტერნეტში ინფორმაცია გავრცელდა, რომ ალექსა სრულიად მოულოდნელად და უმიზეზოდ, სიცილს იწყებს. როგორც წესი, ალექსა ზოგადად მოქმედებას მხოლოდ მაშინ იწყებს, როცა მას მომხმარებელი უბრძანებს, თუმცა ამ შემთხვევაში, ალექსა თვითნებურად იცინის.

ალექსას უცნაურმა საქციელმა არაერთი მომხმარებელი შეაშინა. ისინი Twitter-ზე აქტიურად წერდნენ, რომ ამაზონის პროდუქტმა ერთიანად აურია.

აი, რას წერს ერთ-ერთი შეშინებული მომხმარებელი: "ლოგინში ვიწექი და ის იყო უნდა ჩამძინებოდა, ალექსამ ძალიან უცნაური და ხმამაღალი სიცილი მორთო... დიდი შანსია, დღეს ღამით მომკლან".

The Verge-სთან საუბარში, ამაზონის წარმომადგენელმა დაადასტურა, რომ პრობლემა მართლაც არსებობს და უკვე მუშაობენ მის გამოსასწორებლად.