9 ყველაზე უხერხული კითხვა, რომელსაც ბავშვები მშობლებს უსვამენ

ბავშვების აღზრდა რთული, საპასუხისმგებლო და მოულოდნელობებით აღსავსე საქმეა. პატარებმა არ იციან წესები, რომლებზეც მოზრდილები შეთანხმებულები ვართ. ამის გამო ისინი ხშირად ეხვევიან სასაცილო სიტუაციებში, თუმცა, უფრო ხშირად, უხერხულ მდგომარეობაში უფროსებს აგდებენ.

რა უნდა ქნათ მაშინ, როდესაც ბავშვი "რთულ" კითხვას გისვამთ? თუ თქვენი შვილია, აუცილებლად უნდა უპასუხოთ, ხოლო თუ თქვენი შვილი არაა, შეგიძლიათ ეს თავსატეხი მის მშობლებს გადააბაროთ.

1. საიდან ჩნდებიან ბავშვები?

ნუ მოუყვებით ამბავს კომბოსტოზე ან წეროებზე. ეცადეთ, რომ ასაკის შესაბამისი პასუხი გასცეთ. პატარა ბავშვებისთვის იმის გაგებაც საკმარისია, რომ ბავშვები მუცლიდან ჩნდებიან. გახსოვდეთ, მხოლოდ იმ კითხვებზე უნდა უპასუხოთ, რომელსაც ბავშვი გისვამთ. ნუ გასცემთ ზედმეტ ინფორმაციას.

2. მოწევა თუ კლავს, რატომ ეწევი?

ბავშვები ყველაფერს პირდაპირ იგებენ, ასე რომ, ისინი მართლა ღელავენ, რომ მოწევა მოგკლავთ. აუხსენით, რომ ეს მავნე ჩვევაა, როგორც, მაგალითად, ტკბილეულის ჭამა. თუ თავის დანებებას აპირებთ, ესეც შეგიძლიათ უთხრათ, მაგრამ ტყუილად არაფერს დაპირდეთ.

3. სად ცხოვრობს ახლა ჩვენი ძაღლი, ფისო, ზაზუნა, რომელიც გარდაიცვალა?

ნუ მოატყუებთ ბავშვს, მაგრამ მის მიმართ სასტიკიც ნუ იქნებით.

4. დედას რატომ აქვს დიდი მუცელი?

იხილეთ პირველი პუნქტი.

5. მამას რატომ აქვს დიდი მუცელი?

იმიტომ, რომ ლუდი უყვარს, ალბათ.

6. თოვლის ბაბუა მართლა არ არსებობს?

სანამ ამ კითხვას უპასუხებდეთ, უნდა გაითვალისწინოთ, რისი მოსმენა სურს თქვენგან ბავშვს. თუ ის გულდაწყვეტილია იმით, რომ თოვლის ბაბუა შეიძლება გამოგონილი იყოს, შეგიძლიათ კიდევ ცოტა ხნით გაუხანგრძლივოთ კეთილი ზღაპარი, მაგრამ თუ სიმართლის მოსასმენად მზადაა, მაშინ თავს ნუღარ მოისულელებთ.

7. ნატუკა მიყვარს და ვაკოცო?

აუხსენით, რომ აუცილებლად ჰკითხოს ამის შესახებ აზრი ნატუკას.

8. მე უფრო გიყვარვარ თუ ჩემი ძმა/და?

ამ კითხვის მოსმენა ცხოვრების განმავლობაში უამრავჯერ მოგიწევთ და პასუხი, რა თქმა უნდა, თავადაც იცით. უნდა უთხრათ, რომ ის უფრო გიყვართ. ვხუმრობთ, ვხუმრობთ. აუხსენით, რომ შვილები თანაბრად გიყვართ და ჩაეძიეთ, რატომ გაუჩნდა ასეთი კითხვა.

9. რატომ არ შეიძლება ბოლო აიფონი მქონდეს, თუ ჩემს კლასელს აქვს?

იმიტომ, რომ შენი კლასელის მშობელი მე არ ვარ! თორემ მასაც არ ექნებოდა.

ბოლო ამბები:

გირჩევთ