როგორც სხვა დედებს, ალისა სალგადოს თავისი 2 წლის გოგოში ყველაფერი უყვარს - მათ შორის, მისი წარბებიც.

წარმოიდგინეთ ალისას გაოცება და ბრაზი, როცა ბაღში შვილის წამოსაყვანად მისულს, თავისი პატარას წარბები ამოპუტული დახვდა.

"დავინახე წითელი ლაქები მის წარბებს შორის და თავიდან ვიფიქრე, რომ გაეჩხაპნა, მაგრამ მოგვიანებით, აღმოვაჩინე, რომ ბაღის თანამშრომელმა ჩემს შვილს გადაბმული წარბები ამოუღო" - დაწერა მან ფეისბუკზე.

ალისა დასძენს, რომ ბაღის თანამშრომლებს მის შვილზე შეხების უფლება არ ჰქონდათ:

"მე ჩემი გოგო გავაჩინე, მისი ყველაფერი მიყვარს და ამ "ქალებმა" საკუთარ თავს უფლება მისცეს, მისი გარეგნობა შეეცვალათ და გადაეწყვიტათ, როგორ უნდა გამოიყურებოდეს ჩემი შვილი".

სალგადომ შვილი ბაღიდან უკვე გამოიყვანა. მისი თქმით, ბაღის აღმზრდელებმა მის შვილს ტკივილი მიაყენეს და თავს დამნაშავედ გრძნობს, რომ, თავისი გოგოს დაცვა ვერ შეძლო და ამ დროს მის გვერდით არ იყო. დედა დასძენს, რომ შუბლზე თმის ამოპუტვაზე მის შვილს ალერგიული რეაქცია ჰქონდა, ტირილით გაიღვიძა და სხეულზე გამონაყარი ჰქონდა.

ვაშინგტონის შტატის პოლიცია ინციდენტს უკვე იძიებს.