ალბათ გახსოვთ მექანიკური საფრთხობელა, რომელიც უდიპლომო სასიძო ბიჭიკომ შექმნა.

ისიც გემახსოვრებათ, რომ შეშინებული ვარდენის გამო კოლმეურნეობამ ახალგაზრდა გამომგონებელს განვითარების საშუალება არ მისცა. ვინ იცის, რომ არა კომუნისტური წყობა, იქნება ბიჭიკოს აგრობიზნეს სტარტაპი წამოეწყო, ბევრი ფული ეშოვა და ახლა მისი დაარსებული კომპანია სხვადასხვა ინოვაციებსაც შემოგვთავაზებდა.

ერთ-ერთი ასეთი მოწყობილობა, რომელიც ბიჭიკოს სტარტაპს შეეძლო შეექმნა, ჰოლანდიურმა Bird Control Group-მა გამოიგონა. Agrilaser Autonomic ლაზერული ქვემეხია, რომელიც ფრინველებს დააფრთხობს. ცხადია, ლაზერი და მით უმეტეს ლაზერული ქვემეხი განადგურებასთან ასოცირდება, მაგრამ ამ შემთხვევაში, მოწყობილობა დაუპატიჟებელ სტუმრებს შეაშინებს და მოატყუებს, რომ მათ საფრთხე ელით.

Agrilaser Autonomic ლაზერები ორეგონის შტატის ერთ-ერთ ფერმაში განათავსეს. 6 ცალი ქვემეხი ლურჯი მოცვის პლანტაციების გარშემო განათავსეს და როგორც მეპატრონეები ამბობენ, ზარალი 99%-ით ანუ 99 733 დოლარით შეამცირეს.

მოწყობილობა ძვირი ღირს, ერთი ცალი Agrilaser Autonomic $10 ათასი ღირს, თუმცა შედეგი თუ ვიმსჯელებთ, აშკარად ღირს.