საერთაშორისო ფინანსურმა გამოცემა — Global Finance-მა, 27-ე ყოველწლიური დაჯილდოების ფარგლებში, გალტ & თაგარტი საქართველოში 2026 წლის საუკეთესო საინვესტიციო ბანკად დაასახელა.

ამ აღიარებით გალტ & თაგარტმა კიდევ ერთხელ განიმტკიცა ლიდერის პოზიცია ადგილობრივ ბაზარზე და საუკეთესოდ დასახელდა ისეთ გლობალურ ლიდერებთან ერთად, როგორებიცაა Goldman Sachs, Citi, Morgan Stanley და სხვები.

გამარჯვებულების გამოვლენისას Global Finance-ის რედაქტორები და დარგის ექსპერტები მონაწილეებს აფასებდნენ ისეთი კრიტერიუმებით, როგორებიცაა: ბაზრის წილი, განხორციელებული ტრანზაქციების რაოდენობა და მოცულობა, მომსახურებისა და კონსულტაციის ხარისხი და სხვ. შეფასებისას ასევე გათვალისწინებული იყო 2025 წელს გამოცხადებული და დასრულებული გარიგებები.

“Global Finance-ის მიერ გალტ & თაგარტის საუკეთესო საინვესტიციო ბანკად დასახელება ჩვენი გუნდის პროფესიონალიზმისა და იმ ძალისხმევის შედეგია, რომელსაც საქართველოში კაპიტალის ბაზრის განვითარებისთვის ვწევთ. ჩვენთვის ეს ჯილდო ნიშნავს არა მხოლოდ მიღწეული შედეგების აღიარებას, არამედ პასუხისმგებლობას, გავაგრძელოთ კაპიტალის ბაზრის განვითარება საქართველოში, შევთავაზოთ მომხმარებლებს მაღალი სტანდარტის, ღირებულებაზე ორიენტირებული მომსახურება და დავნერგოთ ინოვაციური მიდგომები როგორც ქვეყნის, ისე რეგიონის მასშტაბით”. — განაცხადა გალტ & თაგარტის გენერალურმა დირექტორმა, გიორგი კუპრაშვილმა.

Global Finance-ის დამფუძნებლისა და სარედაქციო დირექტორის, ჯოზეფ ჯარაპუტოს განმარტებით, 2026 წლის გამარჯვებულები ის ორგანიზაციებია, რომლებიც მომხმარებლებს უმაღლეს დონეზე ემსახურებიან და, იმავდროულად, ადგენენ სრულყოფილების, მდგრადობისა და ლიდერობის სტანდარტებს გლობალურ საინვესტიციო საბანკო ინდუსტრიაში.

აღსანიშნავია, რომ გასულ წელს გალტ & თაგარტი საქართველოში საუკეთესო საინვესტიციო ბანკად Euromoney-მაც დაასახელა.