მაიკლ ჯექსონის ბიოგრაფიული ფილმის, Michael-ის პირველი შეფასებები უკვე ცნობილია და Rotten Tomatoes-ის კრიტიკოსები, თამამად შეიძლება ითქვას, რომ აღფრთოვანებულები ნამდვილად არ არიან.

ფილმში მთავარ როლს მაიკლის ძმისშვილი (ჯერმეინ ჯექსონის ვაჟი), ჯაფარ ჯექსონი ასრულებს. კინოსურათის წინასწარი ჩვენებები 23 აპრილს გაიმართება, კინოთეატრებში კი მისი პრემიერა შემდეგ დღეს, 24 აპრილს შედგება.

ფოტო: Lionsgate

ფილმში ასევე მონაწილეობს ჯულიანო კრუ ვალდი, რომელიც მაიკლს ბავშვობის ასაკში განასახიერებს. სიუჟეტი მომღერლის კარიერულ გზას მიჰყვება — დაწყებული ბავშვობის წლებიდან, როდესაც ის ძმებთან ერთად ჯგუფში The Jackson 5 მღეროდა, დამთავრებული მისი სოლო კარიერით, რომელმაც ის მსოფლიო პოპ-მუსიკის ერთ-ერთ ყველაზე გავლენიან ფიგურად აქცია.

ფილმის რეჟისორი ანტუან ფუკუაა, სცენარის ავტორი კი — ჯონ ლოგანი. Michael-ში სხვა ცნობილ მსახიობებსაც ვხვდებით: ჯო ჯექსონის როლს კოლმან დომინგო ასრულებს, ჯოს მეუღლისა და მაიკლის დედის, კეტრინის როლს — ნია ლონგი, ხოლო მაიკლის ადვოკატის, ჯონ ბრანკას პერსონაჟს მაილს ტელერი განასახიერებს.

ფოტო: Lionsgate

21 აპრილს ფილმის კრიტიკული შეფასებები გამოქვეყნდა. ამ მომენტისთვის, Rotten Tomatoes-ის პლატფორმაზე 99 მიმოხილვის საფუძველზე, ფილმს კრიტიკოსებისგან მხოლოდ 35% შეფასება აქვს, რაც უარყოფით რეიტინგად ითვლება. 35% ნიშნავს, რომ პროფესიონალი კრიტიკოსების მხოლოდ მესამედმა გაუწია ფილმს რეკომენდაცია.

კრიტიკოსების დაბალმა რეიტინგმა სოციალური ქსელების მომხმარებელთა ნაწილის უკმაყოფილება გამოიწვია. ერთ-ერთმა მათგანმა დაწერა:

"შევამჩნიე, რომ მაიკლ ჯექსონის ფილმის მიმოხილვებში დაბალი ქულები იმიტომ იწერება, რომ კრიტიკოსებს ფილმში მის მიმართ არსებული ბრალდებების ხილვა სურდათ... მაინტერესებს, იმავენაირად თუ აკრიტიკებდით ფილმ Elvis-ს, რომელშიც საერთოდ არ იყო ნახსენები, რომ მან თავისი მომავალი ცოლი მაშინ გაიცნო, როცა გოგონა მხოლოდ 14 წლის იყო... ხალხს უყვარს ფაქტების შერჩევითად გამოყენება".