ბეტმენი: ნაწილი II თავის ვარსკვლავურ შემადგენლობას კიდევ ერთ ცნობილ სახეს ამატებს. გამოცემა Deadline წყაროზე დაყრდნობით წერს, რომ ჩარლზ დენსთან მოლაპარაკებები მიმდინარეობს ჰარვი დენტის მამის როლის შესასრულებლად ბეტმენის მომავალ გაგრძელებაში.

DC Studios-ს ამ საკითხზე კომენტარი ჯერ არ გაუკეთებია.

ფილმში მთავარ როლს კვლავ რობერტ პატინსონი შეასრულებს. მასთან ერთად ვიხილავთ სებასტიან სტენს ჰარვი დენტის როლში და სკარლეტ იოჰანსონს, რომელიც დენტის მეუღლეს განასახიერებს. რეჟისორის სავარძელს მეტ რივზი უბრუნდება. მან სცენარი მეტსონ ტომლინთან ერთად დაწერა. გადაღებების დაწყება მომავალ თვეში იგეგმება.

ჩარლზ დენსი

ფოტო: Kate Green/Getty Images for BFI

დენსი მაყურებლისთვის კარგად არის ცნობილი ტაივინ ლანისტერის როლით HBO-ს ჰიტში სატახტოთა თამაში. მას ასევე მონაწილეობა აქვს მიღებული ისეთ პროექტებში, როგორიცაა: Alien 3, The Imitation Game, The First Omen, The Day of the Jackal. გასულ წელს მან დოქტორი ფრანკენშტეინის მამის როლი შეასრულა გილერმო დელ ტოროს ოსკარზე ნომინირებულ ფილმში ფრანკენშტეინი.

ბეტმენმა მსოფლიო გაქირავებაში 772 მილიონი დოლარი დააგროვა. პირველ ნაწილში კოლინ ფარელი ბოროტმოქმედ "პინგვინის" როლს ასრულებდა, რის შემდეგაც მან საკუთარი სერიალი მიიღო Max-ზე და სიქველშიც დაბრუნდება. პირველი ფილმის სამსახიობო გუნდში ასევე იყვნენ: ზოი კრავიცი, ჯეფრი რაიტი, პოლ დანო, ენდი სერკისი და ბარი კიგანი.

ბეტმენი

ფოტო: Warner Bros

Warner Bros.-მა სიქველი პირველად 2022 წლის აპრილში, CinemaCon-ზე დააანონსა. თავდაპირველად პრემიერა 2025 წლის ოქტომბერში იგეგმებოდა, თუმცა მოგვიანებით 2026 წლისთვის გადაიდო. ამჟამინდელი მონაცემებით, ფილმის გამოსვლა 2027 წლის პირველ ოქტომბერს არის დაგეგმილი.