სამშაბათს საღამოს CinemaCon-ზე ფრემენები გამოჩნდნენ: მათთან ერთად დიუნის მესამე ნაწილის წარსადგენად ტიმოთი შალამე, ზენდეია, ჯეისონ მომოა და რეჟისორი დენი ვილნევი იყვნენ და მაყურებელს ფილმის პირველი შვიდი წუთი უჩვენეს.

კადრები იწყება ფრემენების ხომალდებით, რომლებიც ნაცრისფერ, ნისლიან ცაში მიფრინავენ და ეშვებიან პლანეტაზე, სადაც წვიმს. ბრძოლაში ჩაბმამდე გალობენ და ამბობენ "ღმერთი იყოს ჩვენთან", მათკენ კი ლაზერები მიფრინავენ და ხომალდებს ანადგურებენ.

საბოლოოდ, გადავდივართ მთლიანი ფილმის ვრცელ პრევიუზე, სადაც მომოას პერსონაჟი, დუნკან აიდაჰო, შალამეს პოლ ატრეიდესს ეუბნება, რომ ის "გამოსწორების ყოველგვარ ზღვარს გასცდა" მას შემდეგ, რაც სამყაროების გამანადგურებლად იქცა.

კადრების ჩვენებამდე ვილნევი სცენაზე ფრემენების არმიასთან ერთად გამოვიდა, რომელთაგან ზოგიერთი თოკით იყო დაკიდებული. მან ხუმრობით თავისი "ამალა" უწოდა და ისაუბრა განზრახვაზე, რომ თითოეული ახალი დიუნი იყოს დამოუკიდებელი კინემატოგრაფიული გამოცდილება.

ტრილოგიის მესამე და დასკვნითი ფილმი, მისივე თქმით, არის "მოქმედებით დატვირთული, უფრო ინტენსიური და ცალსახად უფრო ემოციური თრილერი".

ვილნევს სცენაზე მსახიობებიც შეუერთდნენ, რეჟისორმა კი განმარტა, საით მიდის სიუჟეტი. ახალ ფილმში მოქმედება 17 წლის შემდეგ ვითარდება; ეს არის "სრულიად განსხვავებული სამყარო", სადაც ატრეიდესის "კოშმარები რეალობად იქცა" და მას საკუთარი გადაწყვეტილებების შედეგებთან გამკლავება უწევს.

ჯეისონ მომოა, ტიმოთი შალამე, ზენდეია და დენი ვილნევი CinemaCon-ის სცენაზე

ფოტო: David Becker/Getty Images for CinemaCon

ვილნევის თქმით, ფილმი არის "გამოსწორების ისტორია", თუმცა "ფილმის გულს მაინც ჩანისა და პოლის სიყვარულის ისტორია წარმოადგენს, უფრო სწორად კი, მსხვერპლად ქცეული სიყვარულის ისტორია".

შალამემ თქვა, რომ პოლი "იქცა თავის ყველაზე საშინელ ხილვად და ის იბრძვის... რათა გაარკვიოს, როგორ დაიცვას საყვარელი ადამიანები, სანამ სამყაროს ყოვლისშემძლე ბნელი იმპერატორი ხდება".

ზენდეიამ დაამატა: "როგორც ჩანს, წლები არავის მიმართ ყოფილა კეთილგანწყობილი დიუნში. ეს იყო ნამდვილად რთული, გამოწვევებით სავსე და უხეში რამდენიმე წელი", თუმცა "ბრძოლისთვის კვლავ ბევრი მიზეზი რჩება". მან აღნიშნა, რომ მის პერსონაჟს, ჩანის, ვხედავთ "მისი ცხოვრების სრულიად განსხვავებულ ეტაპზე, სადაც ის ახალგაზრდული მსოფლმხედველობა სრულად გამქრალია".

მიუხედავად იმისა, რომ მომოას პერსონაჟი პირველ ნაწილში დაიღუპა, ის ამჯერად ბრუნდება Ghola-ს (კლონირების) ტექნოლოგიის მეშვეობით.

ასევე ნახეთ: დიუნის კლიმატი — რამდენად შესაძლებელია არაკისის მსგავს პლანეტაზე სიცოცხლე

ვილნევმა დამსწრეებს უთხრა, რომ მისთვის "ემოციური იყო უდაბნოში პოლთან და ჩანისთან დამშვიდობება. ჩვენ პატარა ოჯახივით გავხდით. ეს ჩვენი ცხოვრების 10 წელია".

შალამემ პრეზენტაცია დაასრულა ვილნევისადმი სიტყვებით: "ის არის ის ერთადერთი... ნამდვილი პოლ ატრეიდესი".

ფრენკ ჰერბერტის რომანების მიხედვით გადაღებული დიუნი: ნაწილი სამი ეკრანებზე 18 დეკემბერს გამოვა.