საქართველოს აგრარულ უნივერსიტეტში აგროფორუმის მხარდაჭერა ტერაბანკის ყოველწლიურ ინიციატივად იქცა. ერთობლივი პარტნიორობა უკვე მეორე წელია გრძელდება, რაც კიდევ ერთხელ უსვამს ხაზს ტერაბანკისთვის ახალგაზრდების განათლებისა და განვითარების ხელშეწყობის მნიშვნელობას.

ტერაბანკის მიმდინარე წლის ერთ-ერთი სტიპენდიანტი საბა ჯავახიშვილია, რომელიც აგრონომიის ფაკულტეტის მე-4 კურსის სტუდენტია. მისი თქმით, აგროპროექტი იყო შესაძლებლობა, საკუთარი ხელით შეექმნა რაიმე ღირებული და პრაქტიკაში გამოეცადა ის თეორიული ცოდნა, რომელსაც სწავლის პროცესში ეუფლებოდა.

როგორც საბა აღნიშნავს მოსავლის მოყვანაზე მუშაობის პროცესი საკმაოდ დინამიკური და შრომატევადი აღმოჩნდა: ნიადაგის მომზადებიდან და ჩითილების გადარგვიდან დაწყებული, მავნებლებთან ბრძოლითა და რეგულარული მონიტორინგით დასრულებული.

"კარგად შესრულებული დავალებისა და წარმატებული მოსავლისთვის მიღებული ტერაბანკის სტიპენდია ჩემთვის უდიდესი მოტივაციაა. მათ კი, ვინც ახლა იღებს გადაწყვეტილებას სამომავლო პროფესიის შესახებ, ვეტყოდი: აგროსექტორი მომავლის სფეროა, სადაც თანამედროვე ტექნოლოგიები და ბუნებასთან კავშირი საოცარ შედეგს იძლევა. ნუ შეგეშინდებათ გამოწვევების, რადგან გაღებული შრომა აქ ორმაგად ფასდება.

ვაპირებ, მიღებული პრაქტიკული გამოცდილება საფუძვლად დავუდო საკუთარ წამოწყებას აგრობიზნესის მიმართულებით. მსურს, ჩემი წვლილი შევიტანო საქართველოში ხარისხიანი და ეკოლოგიურად სუფთა პროდუქტის წარმოებაში," — აღნიშნავს საბა.