ქართული ნაციონალური ბალეტის ხელმძღვანელი, ილიკო სუხიშვილი, მუსიკოსების, ნიკა კოჩაროვის და გიორგი გიორგანაშვილის პოდკასტში სუხიშვილების ირგვლივ გავრცელებულ ერთ-ერთ ყველაზე ცნობილ ლეგენდას გამოეხმაურა: თითქოს 1960-იან წლებში უცხოეთში ტურში მყოფ სუხიშვილებსა და The Beatles-ის წევრებს შორის კონფლიქტი მოხდა.

"ასეთი ლეგენდა დადის, რომ 60-იან წლებში თითქოს სუხიშვილების მოცეკვავე გოგოები ლიფტში შევიდნენო, და ლენონი და მაკარტნი შემოვიდნენო, იყო ეგეთი რამე თუ მოგონილი ამბავია?", — ჰკითხა პოდკასტის წამყვანმა კოჩაროვმა ილიკო სუხიშვილს.

"ცოტა სხვანაირად იყო", — სიცილით გაიხსენა ილიკო სუხიშვილმა, მისი თქმით, სუხიშვილების ერთ-ერთ ტურნეზე, მოცეკვავე გოგოებს სასტუმროს ნომერში მოულოდნელად შეუცვივდნენ მთვრალი რინგო სტარი და პოლ მაკარტნი, რომლებიც მოგვიანებით დაცვამ გაათრია.

"კონცერტის მერე ბითლზის წევრები, როგორც წესი, უსაქციელოები იყვნენ ხოლმე, მთვრალები დარბოდნენ სასტუმროში და ლეწავდნენ იქაურობას, ჰოდა ეტყობა, დაინახეს და მოეწონათ ჩვენი გოგოები, ვის არ მოეწონებოდა ახლა,“ — იხუმრა სუხიშვილმა.

მისივე თქმით, სუხიშვილების მოცეკვავეებმა არც იცოდნენ, ვინ იყო ეს ორი მთვრალი ადამიანი, ვინც ნომერში შეუვარდა, აღშფოთებულებმა თავდაცვის მიზნით მუსიკოსებს გრიმის მძიმე ჩანთები ურტყეს და დაასისხლიანეს, ამ პროცესში კი ბენდის მენეჯერი ყვიროდა, ბიჭებს ხვალ კონცერტი აქვთ და ასე სცენაზე როგორ გამოვლენო. ბოლოს ისინი სასტუმროს ნომრიდან დაცვამ გაიყვანა.

პოდკასტის ეს მონაკვეთი შეგიძლიათ აქ ნახოთ:

ილიკო სუხიშვილის მონათხრობმა პოდკასტში დიდი მხიარულება გამოიწვია, ასე აღმოჩნდა, რომ სუხიშვილების შესახებ გავრცელებულ ერთ-ერთ ლეგენდას რეალური, თუმცა ბევრად უფრო ქაოტური და სახალისო ვერსია ჰქონია.