ცხოვრების როგორ ჯანსაღ წესსაც არ უნდა იცავდე, საახალწლო სუფრაზე მაინც აღმოჩნდები. მაგიდაზე კი საცივთან, ხაჭაპურთან, გოზინაყთან და ყველა სხვა გემრიელობასთან ერთად, ცდუნებაც დაგხვდება. ცდუნება, რომ ყველაფერს მუსრი გაავლო.

არადა, როგორ გითხრა, ბებოს გამომცხვარი ხაჭაპური არ ჭამო-მეთქი. ახალ წელს ეგეთ მკაცრ შეზღუდვას არც მე ვემხრობი და არც ჩვენი ტრადიცია ცნობს.

ეს ჩვენი სუფრა, აუარება გემრიელობით, თან იმდენით, ერთ სოფელს რომ დაანაყრებს (ან ორს), მხოლოდ ჭამა ხომ არ არის. საყვარელ ადამიანებთან ურთიერთობის, მასპინძლისთვის ზრუნვის და სიყვარულის გამოხატვის შესაძლებლობაა. ამიტომ, ამ ბლოგში პატარა და გამოსადეგ რჩევებს გაგიზიარებ — როგორ მივიღოთ სიამოვნება ისე, რომ მერე არც კუჭის ტკივილმა შეგვაწუხოს და არც სინდისმა.

1. არასდროს მიხვიდე სუფრაზე მშიერი

ყველაზე დიდი შეცდომა, რასაც, როგორც წესი, ვუშვებთ ხოლმე, სადღესასწაულოდ გაშლილ მაგიდასთან მშიერი კუჭით დაჯდომაა. მთელი დღე რომ არაფერს ჭამ, საღამოს ყველა საყვარელი კერძისთვის ადგილი რომ გეყოს მუცელში — დიდი შეცდომაა. საჭმლის დანახვისთანავე შენი ორგანიზმი გადარჩენის რეჟიმზე გადავა და პირველ რიგში, ნახშირწყლებსა და ცხიმებს დაეწაფება.

გამოსავალი ძალიან მარტივია: მთავარ სუფრამდე 2-3 საათით ადრე მსუბუქად წაიხემსე მაწვნით ან თხილეულით. ამით შიმშილის ჰორმონებს დააწყნარებ და სუფრასაც ცივი გონებით შეხედავ.

2. ჯონჯოლი არ დაივიწყო

ზუსტად ამ სიტყვებით არა, მაგრამ რაღაც მსგავსი გაგონილი გექნება ჯონჯოლზე — რომ დიდად არავის ახსოვს, ვიდრე არ დაინახავენ და მერე ყველას ახსენდება, როგორ ძალიანაც უყვარს.

ჰოდა, სულ ტყუილად ვივიწყებთ ხოლმე. ჯონჯოლი ჩვენი საუკეთესო მეგობარია, როცა საქმე გემრიელ და ზომაზე ცოტა მეტ ჭამას ეხება. ჯონჯოლით ( და სხვა ბოსტნეულით ) ჭამის დაწყება დიდად გამოსადეგი რამეა — კუჭში ერთგვარ დამცავ ბადეს ქმნის და მერე ცხიმებისა და ნახშირწყლების ნელა ათვისებაშიც გვეხმარება.

3. ფხალი — მთავარი მოთამაშე

არ აქვს მნიშვნელობა ისპანახისაა, ჭარხლის, გოგრის თუ პრასის — ფხალი საუკეთესო საჭმელია. ბოსტნეული რომ მარგებელია, ეგ უკვე იცი. ხოლო ნიგოზი, კალორიების მიუხედავად, ჯანსაღ ცხიმებს შეიცავს.

ამიტომ, შენი თეფშიც ფხლით დატვირთე! ვიდრე მძიმე არტილერიაზე გადახვალ.

4. ხაჭაპურის მხოლოდ ერთი ნაჭრის წესი

უკვე გამოგიტყდი, რომ ხაჭაპურზე უარის თქმას ვერ და არ მოგიწოდებ. თუმცა, ზომიერების დაცვა მაინც მნიშვნელოვანია. პირველ რიგში, დაელოდე ცხელ-ცხელს როდის შემოაბრძანებენ მაგიდაზე და ის ერთი ნაჭერი, რომელსაც სინდისის ქენჯნის გარეშე შეჭამ, სწორედ მაგ დროს გადმოიღე თეფშზე.

დაგეხმარება, ფარადაც გამოგადგება. კარგი ხრიკია, რომ თეფში არასდროს გქონდეს ცარიელი, რაც განსაკუთრებით მნიშვნელოვანი მაშინაა, როცა სტუმრად ხარ. მასპინძლისთვის შენი ცარიელი თეფში განგაშის სიგნალია, რომელზეც ერთადერთი სწორი პასუხი, ამ თეფშის დაუყოვნებლივ გადავსებაა. მაგ გადავსებულ თეფშს კი რაც მოჰყვება, ყველამ ვიცით.

5. საჭმელი — სიყვარულის ენა

ზემოთაც კი ვთქვით და გავიმეორებ — სუფრა, ნაირ-ნაირი საჭმლით დამძიმებულიც კი, უფრო მეტად საყვარელ ადამიანებთან ურთიერთობის შესაძლებლობა და ტრადიციაა. ამიტომ, ჭამაზე მეტი დრო, ლაპარაკს და მოსმენას უნდა დავუთმოთ. ასე, სიამოვნებასაც გავიხანგრძლივებთ და ტვინსაც საკმარის დროს მივცემთ, რომ დანაყრების სიგნალი მიიღოს.

ბედნიერ შობა-ახალ წელს გისურვებთ!