ჰარი სტაილსის ფანები დიდ სიახლეს ზეიმობენ — ხანგრძლივი პაუზის შემდეგ, 27 დეკემბერს, მომღერლის YouTube არხზე ახალი, მოულოდნელი ვიდეო გამოქვეყნდა.

მას შემდეგ, რაც 2023 წელს ჰარიმ თავისი რეკორდული ტურნე Love On Tour დაასრულა, საჯარო სივრცესა და მუსიკალურ სცენას თითქმის მთლიანად ჩამოშორდა. ამ დროის განმავლობაში მომღერალმა დაისვენა, იმოგზაურა, რამდენიმე მარათონშიც მიიღო მონაწილეობა და, რაც ყველაზე მთავარია, ფანებს თავი ძალიან მოანატრა. თუმცა ოთხწლიანი პაუზა, რომელიც გრემის მფლობელი ალბომის, Harry’s House-ის გამოშვებას მოჰყვა, როგორც ჩანს, დასასრულს უახლოვდება.

ფოტო: AP

ახალი ვიდეო, სათაურით Forever, Forever, მისი ბოლო კონცერტის კადრებს აერთიანებს, რომლებშიც მომღერალი ფანებისთვის დაწერილ ბალადას პიანინოზე ასრულებს. განსაკუთრებული ყურადღება ვიდეოს დასასრულმა მიიპყრო — ათასობით გულშემატკივრის კადრს თან ახლავს წარწერა "WE BELONG TOGETHER" (ჩვენ ერთმანეთს ვეკუთვნით). ეს ფინალური გზავნილი ბევრმა ფანმა აღიქვა, როგორც დაპირება, რომ მუსიკოსი თავის მსმენელს მალე სრულიად ახალი პროექტით დაუბრუნდება.

ფოტო: Harry Styles

თუ გავითვალისწინებთ, რომ ჰარის სიმღერა As It Was ბოლო წლების ერთ-ერთი ყველაზე პოპულარული ჰიტია, სტაილსის მიმართ მოლოდინი ძალიან მაღალია. რაც შეეხება კითხვას, ნიშნავს თუ არა ეს ვიდეო ახალი ალბომის დასაწყისს — ოფიციალური პასუხი ჯერ არ არსებობს, თუმცა გულშემატკივრები დარწმუნებულები არიან, რომ პოპვარსკვლავი ახლო მომავალში დიდ სიურპრიზს გვიმზადებს.

იხილეთ ვიდეო: